做中女無壓力 阮小儀趙學而樂與皺紋共存

趙學而和阮小儀近日在ViuTV新節目《中女唔易做》中，首次「轉行」體驗不同行業苦與樂。今年同樣已「入五（50歲）」的學而和小儀，是名副其實的「中女」，然而在靠樣搵食的娛樂圈，兩人拒絕「加工」變美魔女，堅持光明正大將皺紋展露人前。

趙學而與阮小儀日前接受訪問時，異口同聲表示到了三字頭後便自覺是中女，小儀更坦言自己在30多歲時最難接受。「嗰時仲係單身中女，但過咗40歲呢關之後，世界又唔同晒，嗰刻要搵嘅唔係結婚對象，係要搵一個令到你餘生快樂嘅伴侶，以前會被傳統思想植入，覺得女人一定要結婚生仔，但其實一切只係自己畀自己嘅壓力同枷鎖。我依家愈嚟愈享受呢個年紀，亦會忠於自己，只要唔好傷害人，咁就每分鐘都好快樂。」

不過學而跟小儀的心態卻完全相反，就算甩拖也可以獨自快樂。學而說︰「雖然我唔算靚，身材又唔係好，但做咗咁多年有啲知名度，就算甩咗拖，自己一條友孤零零，但去邊都好開心、好享受，可以睇多啲世界，識多啲唔同嘅人，我唔係嗰啲要好積極去識人拍拖，唔拍拖一陣都唔係問題。」學而和小儀表示踏入50歲後，人生每一天都開始在倒數，更加要珍惜每分每秒，令自己活得精采，其中一樣令自己活得年輕的方法，就是和年輕人一起工作。

姊弟戀有經驗

事實上，小儀最近毫不掩飾對24歲MIRROR成員呂爵安（Edan）的「愛意」，她笑言︰「鍾意小鮮肉有咩問題？但我真係未試過同細自己咁多嘅男仔拍拖，頂多都係細兩年，而且都溝通到。」身旁的學而搞笑說︰「咁你得閒打畀我傾下偈嘞！我以前好多個男朋友都係年紀比我細，就算我老公都細我兩年，年齡只係一個數字，最緊要思想上溝通到，如果溝通唔到，日後只會日日嘈交，咁揀嚟做咩。」學而的一番言論，不禁令人聯想起她當年和謝霆鋒的一段姊弟戀。

接受天然微調

現今科技發達，女士變靚啲十分容易，但二人卻拒絕「加工」。學而說︰「點解要做美魔女？我唔要零毛孔，人本身需要有缺陷，例如雀斑、皺紋、眼袋，係陪住我哋成長，係屬於我先有，唔一定要抹走或整走佢。我會接受天然微調，好似人手幫你推或者按摩，但打針就接受唔到。」至於擁有「童顏」的小儀則自嘲樣子成熟，唯獨身高可以欺騙人︰「身高令我有優勢，如果我有193（郭嘉駿）咁高就唔係咁講喇，係呢個位着數，但又無得比較。」

服裝：tout a coup（趙學而）、STARS & TART（阮小儀）

撰文︰倪小珊

美術︰梁政敏

攝影︰林良明