好聲好戲│龍天生熱愛戲劇自知冇主角命 工作狂因中風昏倒改變人生觀

龍天生在《好聲好戲》中擔任配音導師，曾經是演員的他有不少電影、電視作品。闊別幕前多年，今次以另一個身分現身，見他花盡心機教外籍演員易宇航和混血兒謝嘉怡等配音，有教無類，成功令他們在舞台上表現到最好，非常難得。龍天生好學不倦，50多歲才戴上四方帽修讀教育課程，希望能夠將配音技巧傳承給下一代。

好聲好氣│多啦A夢花輪同學配音員現真身 資深演員龍天生轉型配音做導師【下一頁】

{{hket:inline-image name="DSC07456.jpg"}}{{/hket:inline-image}}

{{hket:inline-image name="DSC07319.jpg"}}{{/hket:inline-image}}

龍天生1977年參與第六期藝員訓練班入行，同班的有呂良偉、廖偉雄（阿燦）、劉雅麗、廖安麗、樓南光等等，他笑言自己個性很害羞，不過中學年代被老師安排入話劇團，加上師弟高志森的熱情驅使之下，令他對演戲非常著迷。他除了參與黃百鳴開設的話劇訓練班外，更膽粗粗投考入無綫，一做就做了11年時間，於1988年離開無綫。事隔33年，龍天生重返娘家參與《好聲好戲》做導師，他說：「其實離開同回家時感覺差不多，幕前幕後都齊心為件事好。配音節目絕對係香港第一次，諗都冇諗過咁樣推廣配音工作。相信觀眾睇完之後，體會到配音比演戲更有難度，我從頭睇到尾，真係幾感動。」

龍天生無論在電視劇或電影都曾演繹很多小人物的角色，而大部分都是諧趣幽默的配角；面對同屆訓練班同學全部都爆紅，他從來不感自卑，「我有自知之名，思想上我幾早熟，入去電視城我只係想做戲，唔係想紅。當年佳視肯簽我同阿燦，人工好高，點知簽完就倒閉，衰衰哋咪返轉頭去求TVB收番我。當時被公司扣減人工都照捱，點知阿燦就喺《網中人》紅咗。但我唔會眼紅，好戥佢開心，人如果成日妒忌，好難行落去。男主角？真係冇諗過，做到咪試吓。我成日認真演戲，出到嚟大家都係覺得搞笑，外型係咁冇辦法。」

（↓點擊放大睇圖片↓）

好聲好戲｜陳自瑤搵「星爺」助攻攞滿分 洪永城後來趕上楊潮凱出線受壓【下一頁】

離開無綫後，龍天生自問內心對演戲的一團火已經熄滅，因為來來去去都是飾演差不多的角色；於是後來決定轉戰幕後，由演員變成為演員叫車、叫飯的副導，雖辛苦但得著甚多。之後他轉職做配音和配音導演的工作，為了省錢將工作排到密密麻麻，一度忽略了健康。「當時我做緊配音導演，點知好似粵語長片咁咳血，兩個鼻孔噴血，我知一定有問題，原來肺入面有條很細的血管結疤，即係代表爆過，應該曾經有輕微中風。好彩兩個鼻孔一齊流，如果一邊流另一邊上腦就大件事。」他又試過配音時突然暈倒，有見及此，龍天生決定立即戒煙、戒酒，及改變生活習慣，現時變得喜歡行山做運動，「呢件事令我反省自己，呢個世界冇話冇咗邊個唔得，人盡做就得，自己嘅人生觀唔同咗。」

{{hket:inline-image name="DSC07454.jpg"}}{{/hket:inline-image}}

龍天生原來曾經跟囝囝父子檔配《海底奇兵》，當時囝囝大感興趣，但龍天生不想他太早入行，著他先讀好大學。直至大學畢業之後，囝囝決定向金融業發展，而父子檔的配音作品已成為一個美好的紀念。他表示：「其實早於8至9年前，我已經將自己擺位放喺教育上面，我50幾歲先去讀教育課程戴四方帽。」龍天生有教無類，小朋友、成人、曾經毀容的、失明的統統都教；他認為配音技巧不難，最重要是建立到人的自信心。

{{hket:inline-image name="DSC07334.jpg"}}{{/hket:inline-image}}

{{hket:inline-image name="DSC07341.jpg"}}{{/hket:inline-image}}

攝影：潘卓忻
責任編輯：楊安莉

U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】