因敢言而爆紅的ERROR成員郭嘉駿（193），一句口頭禪「知我咩料啦」變得街知巷聞。193最近推出首隻單飛歌曲《睡到三點》，MV截至昨晚九時已超過94萬點擊，當大家現在都「知佢咩料」時，193最感激一班由《全民造星》已全力支持他的「老婆」（粉絲）︰「點會黐綫到鍾意193而唔係姜濤？」
郭嘉駿在ViuTV節目《ERROR自肥企画》中，選擇製作第一首單飛歌曲《睡到三點》，不但邀得人氣KOL阿冰及阿Gi拍MV，熱愛時裝的他更包辦MV中的睡衣服飾，滿足他三個「自肥」願望。193早有出歌心願，眼見隊友肥仔（梁業）及吳保錡先後出歌，令他一直心癢癢；今次終於有歌派台，193親自操刀填詞講失戀，他認為以往的193總是被定型為「黐綫佬」、「搞笑佬」，正好趁今次表達自己的鬥心。
粉絲派雪糕應援
「相信大家都無諗到193會出歌，我唔理人點睇，一路都有學演戲同唱歌，跳舞就真係唔鍾意，所以放棄咗。」193坦言單純利用節目資源製作歌曲並不足夠，惟有碌人情卡，「肥仔出首歌都幾十萬，已經夠我出20首啦！Madboii（作曲人及監製）無問價錢就幫我起隻demo，我自己再拎一嚿錢補貼，因為藝術作品係有價值，我唔想壓搾創作人嘅心血。」
193針對電視數據盒錄收視的言論，令他的IG followers激增，更已經拋離MIRROR「人氣王」姜濤，他說︰「我識分愛戴我同純粹follow我嘅人，我好歡迎嘅，多followers就多廣告賺到錢。」一班「老婆」（粉絲）為迎接「老公」單飛出歌，由今日起至下月中，自資炮製連串大規模應援活動，包括巴士站燈箱應援廣告、商廈大電視廣告，下月5日更會在銅鑼灣街頭安排雪糕車派雪糕及其他應援物，認真厲害。
193特別感激「老婆」的付出：「其實由《全民造星》一路走來。都係一個神蹟，係鍾意都鍾意姜濤啦！點會黐綫到鍾意193而唔係姜濤？真係好多謝佢哋嘅無條件支持，好多謝、好感恩有呢一班粉絲。」
化粧︰Rainbow & Cori @Annie G. Chan Makeup Centre
髮型︰Leo Fan @Chic Private i Salon
服飾︰FENDI（outfit）、HOAX（shoes）
撰文︰楊安莉
美術︰梁政敏