【聲明】港生活網站並無進行電話推廣活動

新任嫲嫲唱《皆大歡喜》𠱁孫 薛家燕︰抱到唔捨得放手

發佈時間: 2021/05/31

薛家燕升呢做嫲嫲,首名內孫於上周三(26日)出世,家燕姐昨日陪兒子石耀庭在醫院會見傳媒,家燕姐提起孫仔即眉飛色舞,完全被孫仔溶化,又大爆孫仔跟她一樣有迷人酒凹。

現年71歲的薛家燕終於如願抱孫,新抱陳素怡(Zoe)一索得男,誕下重七磅半的男B,英文名Julian。家燕姐昨日形容孫仔是一名「大隻仔」︰「新抱今次係剖腹生BB,之前一晚我又興奮又緊張,完全瞓唔着,依家平安出世,我成個人安樂晒。孫仔好大隻,個樣似爸爸,酒凹就似我,同埋佢喊聲好大,嘈醒其他BB。」新任爸爸石耀庭則透露囝囝英文名較斯文,希望囝囝將來會乖巧一點。

讚B仔一抱就唔喊

家燕姐表示孫仔十分健康,食得瞓得,又指孫仔喊時一抱起他便不會哭。家燕姐笑謂︰「個孫好似認得我咁,醫生話佢扭抱,佢哋叫我唔使抱咁耐,但我點捨得放手呢!佢哋話驚我攰,我話咪畀我抱下囉!」囝囝石耀庭踢爆家燕姐唱《皆大歡喜》給孫仔聽,家燕姐哈哈笑說︰「我唱『唏呀唏呀唏』,佢就擘大眼望住我,佢好識𠱁我開心。」問家燕可有幫手餵奶?她笑說︰「新抱餵母乳,所以我餵唔到,但有請24小時陪月幫手。」

另外,家燕姐預告整個六月會停工幫手湊孫,又準備薑醋派給親朋好友︰「我計過要準備200幾至300份,係自己品牌推出嘅薑醋,所以嚟緊真係有啲忙。」她又感謝新城電台同事及高層送給孫仔的禮物及果籃。

採訪︰倪小珊

攝影︰林良明