湯寶如為兒子進修特殊教育

湯寶如接受馬浚偉電台節目《同理‧繼續傾》訪問，兩人大爆做歌手的年代曾經相約打麻將耍樂，不過近年各有各忙，沒太多機會碰面。入行前，湯寶如曾任幼稚園教師，參與歌唱比賽後獲寶麗金賞識簽約做歌手，亦曾推出不少經典歌。可惜後來寶麗金賣盤，加上盜版唱片猖獗，湯記決定暫別樂壇︰「當時我想休息，轉移去讀書，讀犯罪心理學，近幾年再進修特殊教育課程，學習點樣去教專注力不足或者自閉症小朋友。」

湯記選擇讀書原來跟兒子有關，她說︰「我個仔有少少專注力不足，我讀呢啲課程係想了解佢咩事。阿仔話唔想再食嗰啲藥，食完藥無胃口，成個人又好呆。佢近年無再食藥，諗嘢仲快啲，依家已經停晒藥，回復正常生活。」湯記記得當時囝囝被判斷專注力不足時，男友嚇到呆住︰「男朋友好落魄，我同佢講唔使擔心，專注力不足唔係咩大問題，既然係事實，就要接受、面對同處理。」馬浚偉大讚湯記是積極、稱職的好媽媽。