入營拍節目互爆秘密 MIRROR：最大挑戰係素顏

人氣男團MIRROR昨日出席ViuTV新節目《調教你MIRROR》記者會，節目將於今晚首播，12子在梅窩入營接受梁祖堯「調教」，隊長楊樂文（Lokman）坦言拍攝期間最大挑戰是全程素顏示人，眾人更群起踢爆成員柳應廷（Jer）最貪靚，竟以「偽素顏」出鏡。

MIRROR昨日與經理人黃慧君（花姐）及梁祖堯（阿祖）出席記者會，成員呂爵安（Edan）因另有工作而缺席。花姐坦言當初因發現12子有反叛期，就像「唔聽媽咪教」般，所以才促成這個節目。阿祖坦言拍攝最大挑戰是要打開12子的心扉，而隊長Lokman則指素顏才是眾人最大挑戰：「因為平時習慣有化粧同髮型師跟住，Jer好多日都無剃鬚，所以要提早半個鐘起身執番個樣。」

對抗花姐失敗

眾人隨即互相爆料，Jer被公認為最貪靚，拍攝時問隊友借遮瑕膏和髮尾油，Jer解釋說：「因為有暗瘡要遮一遮。」他亦大爆李駿傑（Jeremy）及盧瀚霆（Anson Lo）每日化完粧扮作剛起身。至於最為食的姜濤則被取笑拍攝時「肥腫難分」：「我睇咗少少節目，大家真係唔好被畫面嚇親，問過花姐可唔可以剪走部分片段。（肥咗幾多？）無磅過，係肉眼可見嘅變化，有啲絕望。」同房的Jer取笑姜濤每日食三、四包薯片，食量驚人。

提到Lokman在節目中提及自己很迷失時激動到喊，他說︰「可能疫情下無嘢做，好多時會亂諗嘢，之後講晒出嚟，成個人舒服晒。」眾人表示拍完節目後更齊心向花姐表達意見，不過陳卓賢（Ian）笑說：「對抗還對抗，唔一定成事，上次集合12人想喺MV爭取啲嘢都失敗。」另外，花姐表示已看過部分節目：「我忍唔住喊，所以唔會同佢哋一齊睇，佢哋唔可以睇到我軟弱嘅一面。」提到12子齊心提意見但被花姐拒絕，她解釋：「我都要把關嘅，我唔係慈禧太后，都會聽取意見。其實我都想『調教花姐』，因為睇到佢哋嘅成長，我都好羨慕，希望有人改變我。」

採訪︰Pauline

美術：梁政敏