古天樂（古仔）早前與「宇宙天團」ERROR拍攝廣告，身為影壇大亨的古仔拋下Mr. Cool形象玩到盡，在鏡頭前扭腰跳舞、嘟嘴兼以沙槌打肥仔（梁業）肚腩，193（郭嘉駿）更大膽在古仔面前跳《今期流行》拜神舞，瘋狂互動爆笑彈，不少粉絲跪求古仔帶ERROR殺入影圈！
一向樂於提攜後輩的古天樂，上月到九展欣賞人氣男團MIRROR演唱會，原來近日他更與搞笑組合ERROR、《ERROR自肥企画》的Agent.L（曹梓冲）及盧覓雪合作拍攝餐飲外賣平台廣告，全長約三分鐘的短片於昨午在網上發布。片段開始，肥仔瞓在地上高喊「好熱好熱」，Agent.L繼續黑衫黑超「實Q」造型上陣高呼「secured」，193則手持風扇說︰「無錯！佢就係我『實Q』，知我咩料啦！」
鏡頭一轉，古仔坐在雪櫃隔籬問193︰「咁你又知唔知我咩料呀？肥Doi（肥仔），去開冷氣。」古仔更用手拍打肥仔臉孔，此時盧覓雪出場問︰「係咪熱呀？邊個要雪雪？」眾人直指古仔，古仔無奈道︰「真係正到不得了！」眾人即起哄叫古仔熱就除衫，搞到古仔反問︰「咩廣告嚟㗎，成日叫人除衫。」
阿Dee想請古仔隊啤
其後，眾人一邊輪流玩「除衫」，一邊高唱廣告主題曲《熱到除3》，古仔更激罕落力舉手扭腰跳舞，193則刻意在古仔面前跳《今期流行》經典拜神舞，古仔見狀即扮嬲踢開對方。此外，古仔對肥仔「情有獨鍾」，不但捉實肥仔，又用沙槌打肥仔肚腩「奏樂」，可謂完美融入ERROR。最後古仔嗌cut拉隊收工，肥仔即拋下一句︰「我請食沙律。」擺明「靚抽」吳保錡與女友張沛樂（沙律）。
古仔昨日在IG留言說︰「ERROR首夏日新歌搵咗我嚟唱兩嘴，都係幾過癮嘅。」193亦在IG提及古仔︰「依家知古天樂咩料喇，連我實Q都搶埋。」阿Dee（何啟華）則發帖「搲撈」︰「作為一個演員，無時無刻都要準備好，古生今次可能係嚟casting㗎！上大銀幕指日可待。（古仔）幾時搵我哋去拍戲呀，最多請你飲啤酒吖。」粉絲大讚古仔與ERROR是香港最強組合，又希望古仔再拍笑片。
撰文︰Steven
美術︰顏玉玲