養狗不教，主人之過

自細見到狗就會雙眼發光，好想同佢哋互動，撩佢哋玩。就算十歲嗰陣畀狗咬，都無令我對狗狗產生恐懼。今時今日已經完全唔覺得狗會咬人，可能因為身邊朋友所養嘅狗狗都懂得同人相處。

我有一位朋友，喺朋友屋企被狗咬，之後要去醫院接受多次治療，身心俱疲之餘，亦因為隻狗而令佢同朋友嘅關係，由親密而變得僵硬。嗰隻咬人嘅狗，結果好似被送去人道毁滅，雖然被咬嗰個係我好朋友，但聽到隻狗要死始終都覺得好痛心。

呢件事提醒我，作為狗主必須記得每3年帶狗狗去打瘋狗針，keep晒所有應該要有嘅文件。雖然認為自己嘅狗狗唔會咬人，但可能喺突發事件中整親人時，仲有可能留返佢哋條狗命。

喺香港，當飼養嘅狗隻咬親人，根據《狂犬病條例》第24（1）條，狗主必須即時向警署舉報，並將狗隻送去隔離，等候警署主管人員進一步指示（基於狂犬病風險）。任何人違法，有機會被罰款1萬元。而第25（2）條列明，狗主如果能證明狗隻係受到被咬者或第三者蓄意激怒而作出襲擊，就可以作為抗辯理由。但如果發現係屬於危險狗隻，當向裁判官投訴，根據第167章《貓狗條例》第5條，裁判官亦會考慮是否需要頒布命令，安排狗狗人道毀滅，或接受更有效控制。

所以作為狗主嘅我哋，真係要有「謹慎責任」，一個唔小心，疏忽咗一秒，畀狗狗襲擊其他動物或人類，狗主固然要承擔民事責任，最慘係隻狗有可能要人道毁滅呀。所以，當你隻寶貝有失控嘅行為，除咗出街時幫佢哋帶返個口罩，真係要睇緊啲。

正所謂養不教父之過，無論係小孩或毛孩，都要用愛心和耐性好好培養，咁先唔會害咗佢哋嘅下半生！（本欄逢周四刊登）