【聲明】港生活網站並無進行電話推廣活動

囝囝有6個女朋友 鄭中基陪愛女玩過山車

發佈時間: 2021/06/18

鄭中基(Ronald)昨日以大使身份為香港兒童國際電影節宣傳,育有10歲女兒Emma和6歲兒子Evan的Ronald,大爆被女兒要求生日期間陪玩過山車,他笑稱慶幸自己仍有勇氣玩。

鄭中基在台上分享他經常帶子女入戲院睇戲,不過早年兒子太細,試過被戲院的環迴立體聲嚇親而要離場,他說︰「慢慢佢就鍾意睇動畫,恐龍、King Kong之類,打交或者斷手佢唔驚,反而Peppa Pig佢會驚。阿女第一次睇電影喊,係睇我配音嘅電影,但成件事好溫馨,印象好深刻。」

暑假將至,Ronald透露每年都會找節目跟子女度過,但今年因疫情未能去旅行,所以感到頭痛。他說︰「我個女咁啱七月生日,年年暑假佢生日都要有個活動嘅,今年佢話想去玩過山車,要我同佢玩,好彩我仲敢玩,大多兩年就細佬陪佢去玩。(或者男朋友陪佢玩?)咁又唔好咁快,男朋友等我同佢玩咗先。(阿女有男友?)佢話無,但我個仔就話自己有六個女朋友,佢以為女仔朋友就係女朋友,可能佢得六個朋友。」

台灣個唱或延期

正在趕拍賀歲電影《闔家辣》的Ronald,預計下月頭煞科,他稱︰「因為故事係講成個疫情,可能有啲嘢要補拍。」另外,Ronald原定年底到台灣舉行演唱會,但如今當地爆發疫情,他坦言有跟台灣方面緊密聯繫,但仍未知是否開得成,「小巨蛋到八月底嘅騷已經取消,之後嘅騷要再等通知,我覺得梗係搞掂咗疫情先,打亂工作都無辦法,最重要疫情受控。」

攝影︰林良明

美術︰梁政敏

採訪︰倪小珊

囝囝有6個女朋友 鄭中基陪愛女玩過山車

鄭中基每年暑假都會預留時間和子女們四處遊玩。(資料圖片)