Happy Father's Day 阮兆祥代餅印父親圓夢

父親在家庭中擔當非常重要的角色，是家庭支柱。父親節將至，阮兆祥、何遠東及蔣家旻分享了與父親的相處點滴，當中有傷感、開心及搞笑，而父親在大家心目中又是一位怎樣的人呢？

阮兆祥17歲時，爸爸急病離世，他和姐姐侍母至孝，一切都以媽媽為先，祥仔表示︰「爸爸走嘅時候是年初五早上，只得49歲，好年輕，而我就17歲。當日清晨，爸爸突然感到心口痛，唞唔到氣，我哋即刻同佢做心外壓，又打電話叫救護車，雖然救護車好快到，但都搶救無效，成件事好突然，後尾先知道爸爸係血管閉塞。」爸爸猝逝後，成為家中唯一男丁的祥仔，便肩負照顧家庭的責任︰「我要變得強壯啲去照顧屋企，多咗份責任。」

祥仔憶述早年在活動上，巧遇亡父的一位舊同事︰「佢話我知，我當年參加新秀入咗決賽，爸爸同啲同事講，話為我感到驕傲、為我感到光榮，而呢啲說話，爸爸從來無同我講過，亦從來無讚過我。同埋，爸爸有個夢想就係做幕前，佢好鍾意鑽研粵曲，又好鍾意表演，但當年因為想要有份穩定收入照顧家庭，所以就放棄咗夢想，去咗考警察。」

那次從爸爸舊同事口中得悉父親為自己感到光榮，令祥仔決心做好演藝事業，完成爸爸未完的心願。

祥仔表示︰「『子欲養而親不在』呢句說話，我真係感受至深，爸爸生前去過最遠嘅地方係澳門，好可惜爸爸走咗，唔可以去再遠嘅地方，人生就係充滿遺憾，所以我將呢份孝心全部放喺媽咪身上，希望爸爸能夠放心。我依家嘅成就，係爸爸保佑，雖然佢唔喺我身邊，但佢都會睇到，有時我都會對住爸爸張相同佢傾偈，好似互相溝通咁。」

撰文︰Pat、Pauline

美術︰梁政敏