【聲明】港生活網站並無進行電話推廣活動

何遠東︰爸爸廚藝頂呱呱

發佈時間: 2021/06/18

何遠東跟父親的感情相當好,他對爸爸的廚藝一直讚不絕口,更經常於社交網站分享對方炮製的美食,他大讚︰「有時爸爸聽到我哋話好想食蝦餃、燒賣同腸粉,但疫情下唔可以一家人出去飲茶,爸爸為咗滿足我哋,就學整點心;有時我哋話想食脆皮燒肉,佢又會去學整,最近端午節佢甚至學埋包糭,總之佢令到成家人衣食無憂。」

不過何遠東小時候,亦因太頑皮而被爸爸教訓,「細個嘅時候我成日好食懶飛,試過有次爸爸放工返到屋企,見我坐喺度懶懶散散又唔集中精神做功課,一氣之下『炳』咗我一獲,但係我無怪責佢,反而令我知道原來自己都會有激嬲爸爸嘅時候,而我爸爸鬧完我之後,亦都覺得自己唔啱,翌日走去買雪條『補償』番,佢真係一個好好嘅爸爸。」何遠東稱雖然每年父親節讓大家有機會慰勞父親一年來的辛勞,但他寄語為人子女者,平日也要多多孝順父親:「我希望爸爸每日都快樂,開開心心過佢嘅退休生活。」

何遠東︰爸爸廚藝頂呱呱

何遠東與父母及胞姊一家四口感情要好。(IG圖片)