回帶離婚經歷傾訴女人最痛 江美儀自勉︰我依家好開心

江美儀日前錄影無綫J2台節目《MEAN TALK》，擔任主持的美儀訪問單立文（豹哥）及滕麗名，豈料豹哥竟反客為主，踢爆美儀早年與吳君如胞弟吳君祥離婚後的慘況，令美儀激罕在鏡頭前爆喊，她感性地稱︰「唔好見我咁tough（堅強），都有人蝦我！」

江美儀於18年宣布與吳君祥分手兩年，其後被踢爆原來一直瞞婚，二人早在06年於美國西雅圖秘密註冊，雖說「分手」實質是離婚。一向與美儀私交甚篤的豹哥，在節目中重提老友傷心事，他反客為主捉實美儀的手問道︰「你之前同伴侶分開時有無受好大打擊？」豹哥直指老友當時在背後承受很多，卻沒有公開講。一向牙尖嘴利的美儀即時淚崩︰「我依家無嘢，當時都唔知可以同邊個講！」她回想兩個人由相處到離婚，一切都是累積下來的結果︰「我嘅人生係咪應該繼續落去？兩個人傾完之後覺得可能分開仲好啲，其實你哋（豹哥）知道時已經係好後期，呢件事其實發生咗好耐！」她續稱︰「經理人都話我唔識得釋放，唔好見我咁tough（堅強），都有人蝦我！」

疫情期間最難捱

美儀自言在去年疫情期間過得特別辛苦，全因當時工作量大減，令她胡思亂想，幸好現在工作量回復正常。《東張西望》主持事後採訪豹哥，問他是否有計劃「攻陷」美儀，他認真道︰「我對燈火發誓，我單立文之前無諗過呢啲嘢，朋友要互相扶持，唔通落井下石。」美儀亦笑指豹哥不會如此好戲。此外，昨晨美儀更新IG上載兒時與父母的合照，又po了自己的素顏相︰「運動會製造安多酚，我依家好開心，keep going（一直走）！」

撰文︰Steven

美術︰梁政敏