梁家輝扮謝賢驚喜亮相 胡楓唱足3個鐘嗌喉嚨攰

胡楓（修哥）前晚以89歲高齡在紅館舉行《胡楓約你開心派對2021》演唱會，修哥發揮「舞王修」本色，又唱又跳三小時，活力十足。雖然修哥未能邀得謝賢（四哥）任嘉賓，但「4個小生」依然順利重聚，全因影帝梁家輝粉墨登場，神還原四哥招積造型。

胡楓前晚穿上色彩繽紛的西裝，甫出場即大唱《情花開》，並邀得大批嘉賓開心合唱。修哥在《愛．回家之開心速遞》飾演「綠菜村村長」一角，他特別請來同劇演員呂慧儀、林淑敏、許家傑、張景淳及吳偉豪等任嘉賓，獻唱《愛．回家》主題曲及《舊歡如夢》。眾人感謝修哥讓他們有機會踏上紅館台板，林淑敏說︰「我啱啱入行嘅時候見到修哥，佢同我講『我喺電視機見過你，你要加油，雖然睇你個樣唔會即刻紅，但係你會撈到飯食』，多謝修哥，如果唔係你，我都唔會咁堅持。」

重提四哥掌摑事件

兒孫滿堂的修哥，前晚與兩位孫女及四位曾孫在台上合唱《世上只有》，更特別網上連綫身在英國及加拿大的其他孫仔孫女，一齊隔空大合唱，場面溫馨。之後修哥與《4個小生去旅行》拍檔曾江及Joe Junior齊齊現身，正當觀眾以為「三缺一」時，梁家輝竟穿上四哥招牌皮褸、白褲加黑超登場，他更扮四哥聲綫及語氣說︰「我生勾勾仲企喺度！」不過四人中年紀最輕的家輝一邊跳舞一邊落樓梯時，一度跣腳，他笑說太緊張雙腳「震過貓王」。家輝又大膽重提當年四哥掌摑曾江事件︰「好難得我哋四個小生同台，台上打完交又一齊唱歌，Joe你都係戴眼鏡，要小心，因住飛咗去呀！」

修哥完騷後受訪，提到他在開騷前表示喉嚨痛，他說︰「喉嚨仲痛緊，如果無事，個騷仲正！今晚（前晚）唱足三個鐘，攰就唔攰，不過喉嚨攰啫！」提到梁家輝頂替四哥上陣，修哥說︰「佢係我搵嘅，之前佢做阿B（鍾鎮濤）演唱會嘉賓好搞笑，我已經諗定開騷一定搵佢。」至於真正的四哥是否未能抽空出席？修哥講笑道︰「唔知佢係咪嬲咗我？哈哈，點會吖，大家咁多年老友，無事嘅！」

採訪︰楊安莉

撰文︰Iris

美術︰梁政敏