試音準備殺入樂壇 盧慧敏被男友Ian靚聲冧暈

MIRROR成員陳卓賢（Ian）的模特兒女友盧慧敏（Amy Lo），昨日與許廷鏗（Alfred）結伴出席口罩活動，Amy透露近日正積極試音，準備殺入樂壇與男友「爭飯碗」，但她昨日卻大賣口乖，笑言最愛聽男友Ian唱情歌。

盧慧敏昨日透露近日除了出席公開活動外，還忙於試音，她說︰「因為公司成日見我喺到哼唱，所以叫咗我去試音，試下唔同發展。」可會叫男友Ian教自己唱歌？Amy婉拒說︰「我會搵女老師教我唱，女仔教女仔會知點用把聲唱得好啲。（驚唱得唔好男友會鬧？）又唔係，大家都係成年人，唔會鬧嘅。」兩人可有機會情侶檔合唱？Amy說︰「未，我都係啱啱開始，況且佢又會同啲隊友有唔同發展，所以我同佢會分開（唱歌）。」

Amy與Ian正值熱戀期，問到男友可有私下唱情歌冧她？Amy笑笑口稱︰「又無喎，平時有聽佢啲情歌，所以都足夠；我同廣大粉絲一樣等聽佢出新歌，唔會私有。同埋我好鍾意佢把聲，唱歌好好聽，在公在私都好鍾意聽佢唱歌。」早前Ian表示未收到Amy送的生日禮物，她笑說︰「我送咗生日祝福畀佢，無價㗎！遲啲等佢無咁忙先補祝，唔想草草了事。」至於在父親節可有見男友家長？Amy說︰「無，我只係同自己屋企人慶祝，未見過家長，等時機成熟先。」

許廷鏗無罩出街被當怪獸

同場的許廷鏗透露跟口罩品牌有一段網上情緣︰「我之前戴住呢個品牌嘅口罩po咗限時動態，佢哋咁啱睇到我用，就係咁結咗緣。」身為牙醫的Alfred需要用大量口罩，但之前選用其他牌子口罩時，曾患上皮膚敏感，他說︰「加上鼻敏感，都搞咗一輪，但呢款口罩就無事。」他自爆試過外出忘記戴口罩︰「當時個個都望住我，被人當怪獸咁望。」

採訪︰倪小珊

攝影︰林良明

美術︰顏玉玲