【聲明】港生活網站並無進行電話推廣活動

元朗YOHO MALL奇幻派對 重現《愛麗絲夢遊仙境》經典場景

發佈時間: 2021/06/25

同愛麗絲一齊去探險,係好多小朋友嘅夢想。黛安最近收到白兔先生嘅邀請函,原來《愛麗絲夢遊仙境》一眾好友,將會喺7月10日至8月29日暑假期間,去元朗YOHO MALL舉行奇幻派對,重演戲中多個經典場景呀!

聽講今次「愛麗絲童夢光影仙境之旅」會由YOHO MALL I 嘅中庭開始,由多個熟悉面孔嘅大型塑像迎接大家,奇幻仙境入口就以高達3.5米高嘅奇異發光花做標記,穿過精緻嘅閘門,即可見到多個熟悉嘅奇幻畫面,例如布滿奇形怪狀時鐘、發光撲克牌等嘅「時光仙境隧道」。仙境入面仲有淘氣又神出鬼沒嘅妙妙貓,喺「妙妙貓層層疊茶飲魔法」出沒;亦有瘋帽子喺「瘋狂茶敘」,等大家做座上客。大家更可以見到純真可愛又充滿好奇心嘅愛麗絲,即將墮進「奇幻兔子洞」嘅一刻,真係令人好期待啊。

去完仙境當然要買手信做紀念啦,到時YOHO MALL I中庭將設置期間限定店,發售超過300款主題精品,部分更係活動限定。黛安就私心推介無綫充電器、Airpods case、Switch Case等,精美又實用。買滿指定金額,仲可以換領獨家「夢幻茶具套裝」或「多用途收納袋套裝」收藏㖭。

撰文: 黛安 消息特靈八卦公關
欄名: 八卦名利場