痛失摯友學會珍惜 太極視開騷為禮物

太極樂隊出道36年，原本歡天喜地籌備舉辦周年演唱會，但成員唐奕聰（Gary）三月卻因心臟病發不幸離世，令人惋惜。五個大男人失去摯友，經歷切膚之痛，對人生有一番全新體會；在整理情緒的日子中，卻意外收到紅館檔期的通知，他們都視個唱為Gary送給太極的禮物，首要盡全力做好演出，把Gary的精神在演唱會上呈現出來。

太極樂隊將於八月假紅館舉行兩場「Rainbow After Rain雨後彩虹」演唱會，成員劉賢德（Hi-Fi德）、鄧建明（Joey）、雷有輝（Patrick）、朱翰博（Ricky）和盛旦華（蛇仔）齊集宣傳，透露成員們本來打算各自舉辦個人演出，作為周年紀念的環節，最後再合辦一次大型演唱會，跟歌迷重聚；可惜因疫情緣故，「頭炮」主音Patrick的演唱會已數次延期，最終更告吹，讓他們大感失落。而Gary突如其來的離開，更令五子心情雪上加霜，德哥形容︰「其實太極係咩？太極係MIRROR加ERROR，大家有留意太極嘅符號係一個陰陽嘅圖案，Joey同Patrick兩位屬於『MIRROR』，我同Gary一睇就知係『ERROR』，一半一半；但依家Gary離開咗，就感覺個圖案差咁啲，唔再完整。」

學懂享受人生

提到已故摯友Gary，五子均表示難以接受，Patrick憶起時百般滋味在心頭，「接到呢個消息大家都覺得好突然，我都經歷好幾晚嚎啕大哭。記得有日，我同因葵（太極御用填詞人）喺中環睇完戲，就行到德哥嘅Hi-Fi舖，睇到佢個憔悴樣，大家對眼都喊到腫晒。」Patrick認為事出突然，但他們要用一個適當的心情去對待，彼此學會更珍惜大家的感情。

Gary病逝令他們各自也有心態上的轉變，德哥說︰「Gary嘅離開令我對人生睇法有好大轉變，令我體會到戀物係唔值得，所以我開始考慮慢慢減少我嘅結他珍藏。我發現原來自己嘅時間係好寶貴，平日花咁多時間去抹結他、服侍樂器，到我離開嘅時候，可能唔知邊個會拎到，然後糟蹋晒佢哋。既然時間咁寶貴，唔應該再留戀呢啲事，反而自己盡量去享受人生。」

延續搖滾精神

太極樂隊出道36年，Joey慶幸自己在ViuTV的音樂節目《Chill Club》中擔任結他手，讓年輕的觀眾重新認識這隊殿堂級樂隊，將搖滾的精神薪火相傳。太極五子認為現時的年輕樂隊聰明又有創意，有時候只欠缺一些經歷和編曲技巧，但只要他們願意學，作為前輩絕對樂意教導。Gary生前樂於提攜後輩，跟不少樂壇新人合作，相信他和一眾隊友都同樣期望將年輕樂隊的音樂推向世界，再次為香港樂壇爭光。

【一按睇片】

化粧︰Kei Kei Ng

髮型︰Seiko Sin@HairCulture

場地︰灣仔老雪園

攝影︰羅灝駿、何家賢

美術︰梁政敏

撰文︰楊安莉