無綫主播︱麥詩敏今晨報新聞眼濕濕惹討論 黃紫盈胡孟青鏡頭前灑淚最經典

無綫主播麥詩敏外貌娟而且好笑容甜美，近年成為唔少人心目中嘅主播女神。麥詩敏2014年大學畢業後，做《警訊》節目主持人嘅爸爸麥振江見當時TVB新聞部請人，於是就叫囡囡一試，結果爸爸冇睇錯，現時麥詩敏已經係首席主播之一。麥詩敏曾報道新聞時不斷講錯非常蹺口嘅「中東呼吸綜合症」，被網友不斷洗版，當時麥詩敏只係初出茅廬，事隔多年，她今日又再次成為網民嘅焦點。

{{hket:inline-image name="48361191_2162495467333648_8599038045766811648_n.jpg"}}{{/hket:inline-image}}

麥詩敏今晨報道一則加拿大原住民宿校搵出多具遺骸嘅新聞，期間雙眼通紅，仲好似眼濕濕咁，好似喊完咁樣。網民就紛紛揣測佢眼濕濕嘅原因，有人就話因為當時呢段新聞好慘情，所以令佢忍唔住；不過都有人唔同意，指一個專業主播冇可能咁樣被牽動情緒。亦有每日睇《香港早晨》嘅網民話，麥詩敏成日都係呢個眼濕濕嘅狀態，相信佢只係唔夠休息，並唔係大家所猜測咁。

其實之前亦有主播試過喺直播室淚灑當場，所以大家先有咁多幻想！2013年主播黃紫盈淚灑直播室，當時有消息指佢被較自己高級嘅張文采欺壓，因當值問題而起爭執；爭執後黃紫盈要立即上場報道新聞，情緒未平伏，所以就一臉委屈兼落淚，令人印象深刻。每次被問呢件事，前主播冇正面回應，早前佢喺訪問指件事太複雜，唔係三言兩語就講得清楚究竟發生乜嘢事、對與錯問題，佢擔心講得唔清楚，對任何人都唔公平。

淚灑直播室，仲有股評人胡孟青。2009年匯豐控股收市前競價時段出現跳崖式沽盤，將原本已屬低位的$37一秒間變成$33收市。胡孟青喺有線財經直播節目中最後一秒前準備開口同觀眾講$37收市嘅慘況，但打鐘前一剎，匯控一秒跌$4，收報$33，胡孟青擰晒頭，一邊講「跌得好慘」，更當場灑淚！她事後指自己一股匯控都冇，失控只係替匯豐股民難過，「匯豐股民，當中包括公公、婆婆，睇到佢哋輸得咁厲害，一時感觸便……」

2010年一次財經新聞報道上，另一主播鄭萃雯亦喺鏡頭前流淚，有人估佢輸股票。鄭萃雯喺多年後解釋，因為廠入面啲燈好曬好熱，成張主播枱又放滿晒嘢；佢喺休息時要滴眼藥水滋潤一下，一滴完原來導演唔記得咗提佢只剩3秒鐘就要on air，鄭萃雯只係夠時間將主播枱枱面上啲嘢掃晒落地，但自己就趕唔切抹走眼藥水！