首次宣傳《寶寶大過天》 馬明抱實「囡囡」唔放

馬國明過去幾星期一直身在內地工作，昨日第一次出席主演劇集《寶寶大過天》的宣傳活動，即時化身暖男爸爸，全程抱實「囡囡」梁芯語。至於劇中老婆岑麗香（香香）最近則忙於照顧家庭，剛誕下細仔不久的她，問到會否追個仔，她直言︰「我依家體力應付兩個仔係啱啱好，實在唔敢諗其他嘢住。」

馬國明昨日甫出場就抱緊劇中囡囡「童童」梁芯語，與岑麗香「一家團聚」，場面溫馨。馬明全程抱實芯語不放手，又為她講故事，盡顯慈父一面。而小童星芯語全程表現乖巧，玩遊戲時又令馬明得分，讓馬明冧爆，「太好喇！不枉爸爸喺大陸搵錢番嚟養你！」

另外，馬明在內地登台時獻唱鄭伊健歌曲《一生愛你一個》，被網民大讚他是「被拍劇耽誤的歌手」。馬明表示︰「內地都有得睇呢個劇，大家都話睇得好開心，又讚題材貼地，仲話香香好鬼靚！（抱實個女唔放？）之前拍劇嗰陣，抱得佢耐都覺得重，不過呢排為新劇做緊訓練，要成日拎住好重嘅機關槍。頭先嚟到再抱個女，突然覺得佢好輕磅，小兒科！」

岑麗香暫無意追女

香香就透露大仔Jacob近日特別黐身，她笑言︰「我原本打算睇片跳一陣鄭多燕舞keep fit，點知佢攬實我唔放、我惟有攬住佢跳。（再追個女？）我依家體力應付兩個仔係啱啱好，實在唔敢諗其他嘢住。」

至於飾演外傭的朱斐斐，被網友大讚她十分神似，斐斐說︰「其實今次係第一次有比較連貫嘅角色，事前特別搵咗姐姐幫手，將佢哋啲說話錄音，再不斷聽番去學啲口音。」

採訪︰楊安莉

美術︰梁政敏