鄭衍峰 晉身娛圈潛力股

下月踏入30歲的鄭衍峰（Leonard）加入無綫四年多，近日他獲邀為《識貨》擔任主持，「成就解鎖」與鄭裕玲（Do姐）合作。不過Leonard多年來最「入屋」的莫過於「馮盈盈緋聞男友」這個稱號，他坦言這是福也是禍，但感激有更多人認識他，在工作上可以力爭代表作，不負加拿大家人對他無條件的支持。

鄭衍峰在加拿大長大，畢業後擔任當地中文電台的DJ及電視主持，及後回流在無綫娛樂新聞台擔任主播，口才毋庸置疑。近年Leonard逐漸得到更多機會，參與綜藝節目《港產旅行團》、《流行都市》、《#後生仔傾吓偈》等，其中因主持《#後生仔》而與馮盈盈傳出緋聞。被標籤為「馮盈盈緋聞男友」，Leonard認為是福也是禍︰「上年有好多唔同嘅新聞，多咗人認識係開心，但有時又諗，啲人係想了解我工作定係其他嘢呢？有少少矛盾。」幸好後來經一位導演提醒，讓他恍然大悟，「人哋認識你，就係你發力嘅時候！」

學習演技不再斯文

Leonard回流以來，一直全心投入工作，同時積極裝備自己，參加彭秀慧開設的戲劇班學習演技。Leonard印象最深刻的是，演繹一場因戴綠帽而要鬧爆太太的戲，但彭秀慧認為他「不夠火」，他說︰「佢一直叫我嬲啲咁爆佢，我平時做主持要斯文，但原來演戲係唔可以，要去到好盡，所以睇到自己呢方面嘅不足。」

除了學習演技，自言擁有41吋胸肌的Leonard也嚴格管理自己身形，但原來健碩的他曾是一名肥仔，他笑言︰「當時係肥到阿媽先認得！我有兩段時間減過肥，第一次係14歲，由180磅減到140磅，後來入大學開始拍拖，放縱自己又肥到170磅，直至21歲接觸健身，先留意番飲食習慣。」Leonard認為保持好的身形是工作的一部分，所以完成工作後仍然會捱夜健身。

努力報答父母

對工作、健身的執着，Leonard認為跟家人有關，由成長地加拿大獨自來港發展，父母可說是百分百支持，「我屋企係小康之家，唔係報道所講嘅富二代，幸運嘅係屋企暫時唔需要我有咁大負擔，但作為男仔，父母都會有退休一日，呢個責任始終要孭。四、五年前有機會嚟香港發展，某程度上我覺得有少少自私，但佢哋好鼓勵我，所以如果我輕易放棄，返去做朝九晚五嘅工作，會對唔住佢哋當年嘅支持，呢個諗法就成為我嘅推動力。」

服裝︰Cerruti 1881

鞋履︰Bally

髮型︰Jay Cheung @ HAiR Salon

化粧︰Kyo Lee

場地︰Forest Studio 森居

撰文︰楊安莉

攝影︰羅灝駿

美術︰梁政敏