鄭丹瑞（旦哥）去年開設個人YouTube頻道《健康旦》，邀請不同嘉賓分享自身經歷或健康與養生心得。最近一集他就邀請到已故演員廖啟智的兒子廖文哲及廖文信，兩兄弟在節目中分享成長經歷。
旦哥問兩人對父親廖啟智的看法，哥哥阿哲表示爸爸是一個對自己好有要求嘅人，「佢會訂立規則畀自己但唔會觸犯，對自己工作同人生都好有要求，如佢為咗身體健康，會每朝6點起身跑步，係一個典型嘅完美主義者，會全力去做佢想做嘅嘢。」
而弟弟阿信就指爸爸好敬業樂業，「做戲時好認真，想做到最好，作為爸爸嘅角色時，佢都會好認真做呢件事，例如之前見到我哋起身好攰要返學嘅時候，佢會唔忍心見到我哋咁攰，會車出車入；知道我哋鍾意食咩，成日都買返嚟畀我哋食，對我哋付出好多愛心。我覺得佢作為爸爸同演員一樣認真。」
對於父親廖啟智，兩兄弟同樣認為他兼任嚴父慈父角色。阿哲謂：「佢唔算係一你好惡嘅爸爸，但我覺得佢都算係一個嚴父。佢會想我哋知道一啲價值觀，會話畀我哋聽係啱定錯。」阿信亦表示： 「不過嚴得嚟都會畀空間畀我哋做我哋想做嘅嘢，佢會話畀我哋聽理想嘅做法，但當我哋有唔同想法，佢都會尊重我哋嘅決定，都會同我哋一齊行。」
兩人在成長過程中亦難掩星二代身分，會被標籤為「廖啟智嘅仔仔」，阿哲認該標籤曾帶來困擾，「讀書嘅時候要認識新朋友，佢可能已對你有既有印象，一行埋嚟就話你係邊個邊個個仔。其實困擾一定大，但好難抱怨，因為呢樣嘢係天生，與生俱來，無得抱怨，所以會接受。」
阿信亦言自己比較低調，「唔會隨便話畀人聽我阿爸係邊個，但自己本身都唔係好鍾意用呢個方式介紹自己。想做返自己，而唔係我阿爸係邊個。想新朋友認識我時係將專注力focus番係我本身。不過我自己又冇咁負面，其實呢件都係好事，大家欣賞我爸爸，自己都會開心。」
廖啟智與陳敏兒婚後育有3名兒子，幼子廖文諾在2003年證實患上血癌，至2006年4月5日病逝。旦哥問到兩人當時知道弟弟患病時如何面對，阿哲表示當時大概十幾歲，阿信就6、7歲左右，「個時仲細，知道呢件事好震驚，但其實細佬患病後，大多數時間都係醫院，我哋見面時間相對較少，反而父母面對呢件事負擔較大，我哋個時知道細佬要係醫院醫病，係好辛苦嘅一件事，少咗父母陪伴都要時間適應。」
而阿信表示父母在這一方面處理得幾好，「佢哋會用我哋聽得明嘅語言去講解細佬嘅狀況，到後期少少，佢哋又會同我哋細佬去咗邊，呢種都係一種安慰。」
他又指在弟弟離世後，曾嘗試主動去安慰父母，「嗰時我哋四個係屋企，我爸爸突然間諗起就好唔開心，係度喊，之後我就同佢講你喊咩，呢度最快見到佢應該係你啦，當然係童言無忌，不過佢聽到後就破涕為笑，呢個都係確定我哋有個信仰，我哋之後會係天家再相遇。」阿哲也指家人的互相支持亦是相當重要，「細佬走咗之後，我哋一家相處時間都多咗，關係都幾緊密，都對大家係一種舒緩。」
（↓點擊圖片放大↓）
廖啟智生前父子檔唱歌片段曝光 二仔成人氣YouTuber親回爸爸死訊 【下一頁】
同場加映：欺詐劇團│劉頌鵬執二攤演劇團傻更更新丁 曾遇人不淑靠送外賣還20萬債
U Lifestyle App自家節目登錄《U TV》專區！
↓↓試玩、試食、試用影片任您睇↓↓