【聲明】港生活網站並無進行電話推廣活動

自爆一見鍾情 麥大力孖簡淑兒潛水拍拖

發佈時間: 2021/07/08

麥大力早前被踢爆與宅男女神簡淑兒秘密拍拖,昨日他到中環出席活動時,首度公開認愛,冧爆表示和女友是一見鍾情,又自爆二人經常在「水底談情」,十分浪漫。

港英混血兒麥大力由飛機師轉型做藝人,外形俊俏的他極速被電力十足的簡淑兒「私有化」。昨日麥大力、陳展鵬、單文柔、毛舜筠及黎瑞恩等到中環出席活動,對於跟簡淑兒的戀情,麥大力有問必答相當大方,他冧笑透露拍拖個多月︰「我哋好夾,拍拖好開心,大家有好多共同興趣,好似潛水、行山,我哋都有潛水牌,成日都會一齊潛水。」

麥大力眼中的簡淑兒外表嬌滴滴,但十分堅強,他細說女友的優點︰「女友好有目標,唔會輕易放棄,而且生活好有規律、好健康,成日都會做gym,一個咁健康嘅人,同佢一齊好易相處、好開心。(見過雙方家長?)我哋嘅父母都唔喺香港。(同女友係一見鍾情?)佢好有吸引力,我哋係朋友介紹認識。」至於是否已共賦同居,麥大力表示︰「我哋啱啱先開始,不過都有咁嘅計劃。」他又感謝無綫支持兩人拍拖。

陳展鵬被女兒要求扮超人

同場的陳展鵬和太太單文柔以夫妻檔現身,提到撇甩兩歲囡囡「小豬比」出席活動,展鵬指囡囡在家中要他扮Superman,他表示︰「佢要我抱起佢扮飛人。(唔使去做gym?)係兩樣嘢,親子互動會開心啲。」至於可會一家三口出席活動?展鵬和單文柔表示不抗拒,但疫情下暫不考慮,他說︰「太多人就唔好喇。」另外,毛舜筠透露下月初開始一口氣接拍三套電影,三部戲中都是飾演母親,其中更會與姜濤合作:「我都好期待,好難得三個劇本一睇就鍾意。」

採訪︰倪小珊

美術︰梁政敏

自爆一見鍾情 麥大力孖簡淑兒潛水拍拖

麥大力跟簡淑兒(右)同樣喜愛潛水和行山。(資料圖片)

自爆一見鍾情 麥大力孖簡淑兒潛水拍拖

陳展鵬和單文柔昨日穿上情侶裝現身。