【聲明】港生活網站並無進行電話推廣活動

那些年的追星歲月 林欣彤︰與張栢芝同台合唱

發佈時間: 2021/07/08

近期香港再度掀起追星熱潮,為支持偶像,粉絲都各出其謀,有人會買偶像肖像的產品,或到偶像出沒的地方等候,甚至花費大筆金錢落廣告。事實上,追星不只是年輕人的專利,即使是已成為別人「偶像」的歌星,其實也有他們的青蔥小粉絲歲月,例如林欣彤(Mag)十分喜愛「女神」張栢芝,她更有幸如願與栢芝合唱,美夢成真。

參加《超級巨聲2》入行的林欣彤,原來她的偶像是已為三子之母的張栢芝,Mag說︰「細個好興Yes!Card,我就搏命儲栢芝嘅閃咭,幾乎用晒零用錢買佢嘅產品,但我就無好誇張咁追,未試過去片場、錄音室等佢。我細個家教好嚴,唔好話追星,連出街都好少。」Mag透露,自己最愛聽栢芝的《任何天氣》,又認為她成為母親後依然十分漂亮。

不少fans都希望與偶像見面,Mag也不例外,她更有幸與栢芝同台合唱,「嗰次栢芝喺北京搞生日會,我都獲邀出席,仲安排我同佢一齊合唱!佢好nice,我哋喺台下都有傾偈,嗰次嘅偶像接觸令我好難忘,至今依然記憶猶新。」

鄭欣宜︰幻想與「嵐」眼神交流

自小在溫哥華長大的鄭欣宜,非常迷戀日本偶像組合「嵐(ARASHI)」,她說︰「成個溫哥華得一個地方可以買到ARASHI嘅海報同CD,於是每逢周日我一定去望下佢哋,有時甚至用盡所有零用錢買產品,以前喺加拿大,我成間房都貼滿佢哋嘅海報!」欣宜又笑稱,讀書時手冊內都放滿ARASHI的照片,甚至手抄歌詞,「佢哋所有歌我都識唱、識跳,仲有佢哋rap得好型!」

她曾親身飛到日本看演唱會,回想起第一次現場欣賞偶像的演出,她形容心情無比興奮,「好記得係2003年8月18號睇騷!我哋坐得好前,佢哋喺前面不停同台下嘅fans揮手,我覺得佢哋係同緊我揮手囉,佢哋嘅眼神都係望住我!」

吳業坤︰盧廣仲擔任個唱嘉賓

吳業坤(坤哥)一向是台灣唱作歌手盧廣仲的忠實粉絲,坤哥說︰「佢好有自己嘅signature,由佢嘅外表、作曲、彈結他都好鍾意,我有幾次歌唱比賽都揀佢嘅歌參賽。」2011年坤哥入行做歌手,但他對偶像的支持仍相當熱衷,「好記得11年佢嚟香港,我仲去現場同其他fans一齊舉燈牌;知道佢上《勁歌金曲》,我都爭取去現場打氣。有《TVB周刊》同事知我鍾意盧廣仲,約佢做訪問都叫我一齊去,嗰次我仲膽粗粗搵佢拍片唱歌,又邀請佢做我嘅演唱會嘉賓。到16年我終於喺紅館開首次個唱,佢真係嚟幫我做嘉賓,完成我嘅夢想。」

問到坤哥是否與盧廣仲保持聯絡?他說︰「有呀!有次我去台灣做嘢,佢都約我見面,可惜嗰次有工作在身,無法抽時間。佢真係一個好好嘅偶像,有一年佢喺東京開個唱,都有邀請我去睇騷,我希望下次可以邀請佢為我嘅新碟監製一首歌。」

關智斌︰與鄭秀文保持距離

本是偶像派的關智斌(Kenny),他多年來的偶像原來正是樂壇天后鄭秀文(Sammi)。Kenny讀初中時已視Sammi為超級偶像,最難忘是花盡零用錢扭Sammi的閃咭,他笑說︰「讀書時有本《Yes!》雜誌,我每期都會睇,我會誇張到成日去門市『Yes Station』,捕住部閃咭機,嗰時每日30蚊零用錢,我就用晒去扭閃咭。」

Kenny出道近18年,但原來他入行至今仍未跟Sammi集郵,甚至從未索取過親筆簽名,他大呼︰「我唔敢呀!」Kenny解釋第一次見Sammi真人,就是欣賞她的演唱會;而Sammi每次開騷,他一定會買飛捧場,但他卻不敢入後台跟Sammi作近距離接觸,「同偶像保持距離好啲,所以到依家都唔敢搵佢簽名同合照呀!」Kenny講起偶像即時面紅耳赤,萬一與Sammi撞個正着,相信Kenny真的不知如何是好!

採訪︰Pauline

美術︰梁政敏

那些年的追星歲月 林欣彤︰與張栢芝同台合唱

Mag形容栢芝仙氣十足,是她心目中的女神。

那些年的追星歲月 林欣彤︰與張栢芝同台合唱

欣宜直言現時家中仍收藏ARASHI的海報。

那些年的追星歲月 林欣彤︰與張栢芝同台合唱

欣宜最喜歡的成員是松本潤(右一)。(IG圖片)

那些年的追星歲月 林欣彤︰與張栢芝同台合唱

Kenny第一張買的Sammi大碟,是93年發行的《大報復精選》。

那些年的追星歲月 林欣彤︰與張栢芝同台合唱

Kenny至今仍不敢跟Sammi合照。(IG圖片)

那些年的追星歲月 林欣彤︰與張栢芝同台合唱

坤哥坦言,由盧廣仲出道以來已十分喜歡對方。

那些年的追星歲月 林欣彤︰與張栢芝同台合唱

坤哥16年開演唱會,幸運地邀請到偶像盧廣仲任嘉賓。