【聲明】港生活網站並無進行電話推廣活動

參展商推誘人優惠 書展下周三開鑼

發佈時間: 2021/07/09

黛安每次行書展都買好多書,因為現場有唔少優惠,好吸引。今年書展喺下星期三(14日)起,一連7日喺灣仔會展舉行。公關姊妹話,各大參展商都有限定優惠,例如消委會為慶祝《選擇》月刊45周年,今年攤位設有生日主題打牆卡,自拍打卡有機會贏得本地花藝師嘅手作保鮮花「永恆玫瑰」(左下圖),名額45個;同場訂閱《選擇》月刊1至2年,仲會額外送限定禮品,包括環保不鏽鋼便攜餐具等。另外,出示已打疫苗紀錄者,更可獲贈7月14日出版嘅《選擇》月刊,送完即止㗎。

書展今年首設「綫上學堂」展區,一站式綫上學習平台Snapask,就會以「未來學校」為題設計攤位,最大特色係設有「入大學信心指數」巨型扭蛋機,DSE學生可以$5參與扭蛋活動,每個扭蛋內都有原創紀念品或現金劵㗎。購買即時解題方案及綫上課程嘅年費計劃,仲可免費獲贈CircleDNA基因測試套裝。

另外,設於3樓兒童天地嘅東亞圖書,亦有過千款智能教材低至半價發售。黛安就睇中由德國資深教育專家研發嘅「樂智高LOGICO」,以遊戲方式強化兒童腦部發展,提升專注、解難等能力,喺場內買滿指定金額,仲會送價值$1,580嘅專業攝影套餐等;過千本繪本圖書以低至6折發售,包括新出版《森林裏100層樓的家》、超人氣《屁屁偵探漫畫系列》等,真係好抵!

撰文: 黛安 消息特靈八卦公關
欄名: 八卦名利場