吳若希幫手徵婚 麥美恩拍拖抗拒獨生子︰我好難Sell

麥美恩（Mayanne）日前應邀上好友吳若希（Jinny）的網上節目，大談擇偶條件。雖然現年34歲的Mayanne感情交白卷，但她對擇偶有一定要求，揚言抗拒跟獨生子或孻仔談戀愛，更言之有理的逐點解釋。Jinny公開表示幫忙徵婚，但Mayanne竟拆自己台︰「我好難sell㗎！」認真搞笑。

Mayanne在節目中透露有兩個胞兄，分別比她年長十歲及九歲。問到做妹妹有甚麼着數？Mayanne笑說︰「細個係可以隨時任性嘅，犯任何嘅錯，你嘅懲罰永遠都有藉口去抵銷，會容易無事發生，免死金牌都幾強勁嘅。」

雖然Jinny比Mayanne年輕五歲，但Jinny已婚兼已為人母，加上身為家中的大家姐，自然懂得如何照顧別人。Jinny說：「我直頭覺得喺我嘅血入面，係born to be要照顧人。」Mayanne即表示︰「我同人講我有兩個大哥哥無人信㗎，因為我個人偏向獨立。」說到此時，Mayanne突然怒睥在場的Jinny老公何兆鴻（Alex），爆seed謂︰「做咩啫，何生你成日製造噪音，你睇還睇，唔好出聲吖嘛！」Alex被罵後顯得一臉尷尬，之後乖乖點頭認錯，Jinny則仰頭大笑，完全沒有「幫拖」。Mayanne續說︰「你（Alex）唔好阻住我吖嘛，你搶我風頭！」果然有妹妹專屬的霸氣。

佛系心態等運到

問到尋找另一半時，會否留意心儀對象是哥哥或弟弟？Mayanne直言介意另一半是否獨生子或孻仔，她解釋︰「識到大哥係最好嘅，佢會識得去照顧人，獨仔就真係縱壞。」Jinny即細細聲認同說︰「何生真係唔做嘢，同埋會點人做嘢。」Mayanne指獨生子通常為人非常麻煩︰「佢哋會覺得點解要我去做，慣性聲控所有人去招呼佢。其實孻仔都麻煩㗎，但至少佢哋會𠱁人開心，人又浪漫。」Jinny乘機表示要幫Mayanne徵婚，Mayanne指自己是佛系心態︰「我好難sell㗎，所以我依家係是但啦，邊個都得。」

撰文︰Pat

美術︰梁政敏