黎明演唱會｜林日曦致歉做嘉賓令歌迷失望 黎明重酬撬開金口：嘉賓好似香檳咁

黎明（Leon）昨晚（12日）第三場《Talk & Sing 2021紅館演唱會》，邀請好友林日曦擔任表演嘉賓，導演彭秀慧、歌手陳凱詠和曾比特等都有捧場。「腦細」林日曦台上分享與Leon的溝通技巧，二人大講金句，更預定明年為Leon舉行Talk Show叫「夏日傾偈」；之後他們又自封「初代大叔的愛」，手拖手對唱《但願不只是朋友》，掀起高潮。

{{hket:inline-image name="527A5530-.jpg"}}{{/hket:inline-image}}

當Leon與林日曦齊齊升上舞台時，全場以掌聲歡迎。林日曦對Leon說：「你啲歌迷真係有禮貌，佢哋見到我升上台都盡力掩飾住嗰份失望，繼續歡呼拍掌。」然後對觀眾說：「你估我唔知你哋諗咩，前晚嘉賓係林海峰、噚晚嘉賓係Sammi，今晚都應該係MIRROR或者係子華……但sorry，係我呀！我真係好鄭重同紅館嘅歌迷講『對唔住』，冇錯，今晚嘅嘉賓好不幸係我。」他續說：「你哋買飛入嚟唔係睇嘉賓，要諗返你哋個初心，買飛係睇Leon嘛！我都係Leon嘅朋友。希望大家大人有大量，原諒我好冇？」全場齊聲回答「好」。然後再對Leon說：「佢哋真係話『好』，係真心見到我做嘉賓而失望。有你喺度，佢哋暫時原諒咗我！」不過他就向觀眾「派定心丸」，話自己不會講好耐：「唔會做talk show，又唔會唱歌跳舞。我係好想上嚟紅館舞台，親口同黎明講一句：『多謝你，Leon，你隔咗咁耐終於肯開紅館！』」

林日曦又在台上分析今次演唱會名：「今次個演唱會叫『Talk＆Sing』，talk比sing前，代表Leon終於公開承認自己鍾意講嘢多過唱歌！我可唔可以要求Leon下次真係開talk show？（台下大聲歡呼）為咗鼓勵你開Talk Show，我連名都諗埋，今次叫做『Talk＆Sing』，下次叫做『Talk＆Talk』，剩係talk冇sing。」他看一看Leon，再說：「佢好似唔係好鍾意，不如叫『情深金句未曾講』……又好似唔多鍾意，不如就叫做『對不起 我愛講嘢』。」到此Leon終於開口：「其實兩個名都幾好，不如我casual啲叫『夏日傾偈』！」全場即刻拍掌。林日曦又再說：「就等我幻想下，2022年夏天『黎明talk show之夏日傾偈』，真心得喎，我都想睇。」問觀眾會否買飛入場時，全場大叫「會」。林日曦約定觀眾，Leon就笑著點頭說：「Best try. 」

之後林日曦表示退場：「我頭先上台嘅時候，見到好多人去廁所，而家見大家陸續返埋位。我今日任務完成，都係時候落返台……」黎明立即拉住他，「你今日唔嚟，本來只係一個正常黎明演唱會；腦細嚟咗，將成個紅館變成公司例會。」林日曦指他又爆金句，說：「好多人問我平時點同黎明傾偈？我心諗：有幾難明？明就明，唔明就黎明！」黎明認同，笑說：「今日唔明，聽日自然明㗎啦！」林日曦又說：「其實我都算係少數同佢溝通到嘅人。佢有金句，我都有銀句，有慧根可能聽得明，留心少少就得。」

二人在台上重演Leon邀請林日曦的電話對談，Leon說：「曦，我紅館開台想搵你做嘉賓。你知嘉賓好似香檳咁，唔飲無問題，飲咗更加High。」對方一口答應，不過就問有無酬勞，「因為酬勞好似香檳咁，有都得，無就更佳！」Leon又說：「酬勞無問題，你肯唱歌嘅話，酬勞更加高！」林日曦表示唱歌無問題，但有「走音」壞習慣，Leon笑言：「揀啱歌，點走音都只係留喺紅館入面啫！」全場爆笑。林日曦說：「揀歌同揀朋友，最緊要真心。我睇番我哋之前拍廣告，踩單車嗰次，都算係『初代大叔的愛』，所以揀咗一首你嘅舊歌，你畀隻手我。」他們手拖手對唱《但願不只是朋友》，不時情深對望，全場跟著大合唱，掀起高潮！

同場加映：黎明演唱會第二場又Rap又跳舞 嚇窒嘉賓鄭秀文：你個人好飄

{{hket:ul-video id="3545"}}{{/hket:ul-video}}

U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】