與龔嘉欣姊妹情深 姚子羚否認曾不和

無綫昨日舉行奧運宣傳活動，不少藝人出席支持。有份出席活動的姚子羚早前傳出曾與閨密龔嘉欣不和，有指子羚不滿被姊妹「出賣」戀愛史引致反目。昨日子羚透露她與嘉欣近日合作拍攝《仨心友行2》，在40度高溫的玻璃屋內拍攝相當辛苦。被問到兩人是否已經冰釋前嫌？她說︰「從來都無嘢，係外間講啫，我哋以前都飛過去馬來西亞做節目，所以有晒默契。」

至於將在本周五前往東京採訪奧運的方力申（小方），近日被問到會否翻撻舊愛鄧麗欣（Stephy）時，他回應兩人連朋友都不是，引來一眾網民不滿。小方昨日解釋只是開玩笑︰「好明顯係講笑，我再講一次，嚴格嚟講，我係佢fans，唔係朋友，因為網絡世界要互相follow先至係朋友，（你留意佢IG？）係其他人話我知。（驚唔驚Stephy誤會？）唔會，娛樂圈係咁至有話題，我講傑青都無人理，我將個波交番畀Stephy講。」

同場的余德丞（Dickson）曾與蔡思貝傳緋聞，早前思貝患上風癩入院，Dickson聞言後反應甚大︰「吓！咁誇張？我媽咪都有教我可以搽酒餅喺患處，（你唔教思貝？）我都唔知佢生風癩！大家終於發現其實我同佢唔係好熟。（有無煲湯畀佢？）我連微波爐都唔識用，仲話煲湯！」

採訪︰Pauline