【聲明】港生活網站並無進行電話推廣活動

冀先結婚後生B 馬國明想代湯洛雯大肚

發佈時間: 2021/07/15

無綫劇集《寶寶大過天》本周五將播放大結局,眾演員昨日出席宣傳活動,分成男女兩組進行「媽媽初體驗」,藉此感受懷胎十月的辛酸。馬國明直言明白女性懷孕的辛苦,更表示如果男人可以生B的話,自己不介意擔當這個角色。

馬國明與吳岱融昨日在活動上,一同感受女性懷孕陣痛的感覺,只見吳岱融全程表現痛苦,最後忍不住要拔掉儀器,相反馬明似乎輕鬆「過關」。馬明表示︰「玩遊戲嗰時又唔覺好痛,只係好似有電流『嗱』住咁。如果男人可以生仔嘅話我都想試,因為母愛真係好偉大,懷孕過程亦相當辛苦,男士無呢個福氣去嘗試,但經過今次之後,感受到小朋友同媽咪嘅心靈連結天生係強啲。」

問到現實中何時做爸爸?馬明表示暫時未有計劃,但希望先結婚後生B,不過他笑言有意外的話會再公布。至於女友湯洛雯(靚湯)可有結婚生子的計劃?馬明稱靚湯一劇接一劇比自己更忙,他又自爆近日長時間開工,睡眠不足而日漸消瘦,他說︰「拍新劇《隱形戰隊》我應該要大隻啲,但偏偏唔夠瞓啲肌肉就會流失,同劇嘅陳山聰同林子善都操慣,我要向佢哋請教下。」

不應單睇收視

《寶》劇口碑不俗,監製透露有意開拍續集,對於收視更勝同期推出的重頭劇《刑偵日記》,馬明表示︰「兩套劇時段、劇種都唔同,好難淨係憑收視去睇成績,加上依家觀眾睇電視嘅習慣都改變晒,收視始終都係講運氣,我覺得口碑更加重要。」

另外,同場的利穎怡在劇中扮大肚,不過現實生活中已婚兩年的她,則表示暫時未有生育計劃,又指任職銀行的老公跟她一樣,只喜歡跟小朋友玩。她笑言︰「因為我媽咪喺加拿大,疫情下都返唔到香港,如果媽咪同奶奶肯湊都會考慮(生B)嘅。」

採訪︰Pauline

美術︰梁政敏

冀先結婚後生B 馬國明想代湯洛雯大肚

利穎怡(左一)與劇中一眾女演員齊齊扮大肚。

冀先結婚後生B 馬國明想代湯洛雯大肚

劇中一眾演員落力宣傳,惟欠女主角岑麗香。