【聲明】港生活網站並無進行電話推廣活動

王丹妮演《梅艷芳》神態極似 古天樂︰畀佢嚇到心寒

發佈時間: 2021/07/16

電影《梅艷芳》仍未上畫,但早前公開預告片已引起不少討論。戲中兩大主角古天樂(古仔)和王丹妮(Louise)日前接受鄭裕玲(Do姐)訪問,在電影中飾演梅艷芳的新人Louise,由於跟梅姐的神態氣質非常相似,古仔憶述拍攝趣事時,笑指曾被對方嚇到心寒。

早前鄭裕玲獲邀訪問古天樂和王丹妮,細談兩人合作的緣份與趣事。在電影中,古仔飾演著名時裝設計師劉培基,他與梅姐亦師亦友,陪伴梅姐成長,當年也幫助梅姐完成「嫁給舞台」的夢想。古仔表示︰「喺梅姐最後一場演唱會,佢搵劉培基完成佢嘅夢想,幫佢做一套婚紗嫁畀舞台,其實梅姐過往好多大膽、創新、前衞嘅造型都係劉培基為佢設計。」

另外,古仔在戲中跟新人Louise有不少對手戲,他大讚對方勤力,做足準備功夫,無論形態、說話語氣都與梅姐十分神似。古仔又憶述一次拍攝時的趣事︰「我拍攝嘅主景係一幢舊樓,記得有次cut機,啲燈熄晒,當我行到樓梯轉角嗰下,燈光好暗下望到Louise嘅身影,當場嚇咗一跳,心寒起嚟,可想而知佢到底有幾神似。」

壓力爆煲避走泰國

至於Louise首次接拍電影,便要演繹一代天后梅艷芳,讓她承受巨大壓力,更自爆曾逃到泰國避世,「當我一知道被選中做呢個角色,我第一個反應係好驚,所以即刻買機票去泰國,匿喺房喊足兩日,先消化到呢個消息。直至踏出酒店房門口,我就同自己講既然揀咗我,就努力去做好!」

Louise首登大銀幕難免怯場,她感激古仔在現場親授演戲心得,古仔則說︰「有一場要佢喊嘅戲,為咗令佢容易入戲,我建議佢回憶佢同爸爸相處嘅往事,將嗰啲情緒放入場戲,就會好容易釋放自己感情。」當Do姐追問古仔對Louise有甚麼勸告時,他搞笑對身高179cm的Louise說︰「唔好着咁多高踭鞋!」

撰文︰倪小珊

美術︰梁政敏

王丹妮演《梅艷芳》神態極似 古天樂︰畀佢嚇到心寒

古仔一向樂於幫助新人,今次也親授Louise演技。

王丹妮演《梅艷芳》神態極似 古天樂︰畀佢嚇到心寒

Louise與梅姐同由比賽出道,也是在單親家庭中長大。