早餐界代表鬥講金句 張敬軒孖黎明唱《我的親愛》圓夢

黎明（Leon）前晚舉行第八場紅館演唱會，邀得「早餐界KOL」張敬軒任嘉賓。Leon有「唔可以空肚食早餐」的經典金句，而軒仔亦經常分享家中工人「遮遮」的暗黑料理，二人在台上爆笑大談早餐；自認Leon忠粉的軒仔，更與偶像合唱快歌《我的親愛》圓夢，二人走勻全場跳經典手勢舞，全場high爆。

張敬軒前晚在台上提到黎明的早餐金句說︰「你就唔可以空肚食早餐，而我就食完早餐都空肚！因為屋企請咗個十分優秀嘅家務助理……」Leon恍然大悟，軒仔續說︰「所以我哋上次食飯嘅時候，我咪食好多，食咗兩份。」Leon感嘆︰「有時真係可以練到EQ！」觀眾忍不住爆笑。

軒仔自認是Leon的忠粉，所以站在偶像的紅館舞台上感覺很神奇︰「以前有前輩同我講，如果遇到崇拜嘅藝人要保持距離，保持幻想空間。直至我同Leon近年食過一餐飯，之後先開始有聯絡。我2002年入行，行內每當有人提到黎明，大家都會話『佢真係好好人』。的確，Leon係我遇過、相處過嘅前輩之中最體貼嘅一位。」

齊跳經典舞步

Leon問軒仔合唱甚麼歌？軒仔大賣關子︰「我識唱晒你所有歌，今晚（前晚）揀咗一首你好少喺公開場合唱嘅經典歌。雖然因為疫情唔可以同觀眾握手，但呢首歌都可以同大家互動，大家一定識唱同埋識做動作。可以同你合唱呢首經典名曲，我圓夢啦！」當前奏響起《我的親愛》，全場歡呼，軒仔問觀眾︰「各位阿May（粉絲）準備好未？」全場觀眾即站起來，一邊大合唱「Sayonara o Sayonara o」，一邊齊齊跳舞做手勢，氣氛熱烈。

撰文︰Iris

美術︰梁政敏