【職場分享】網民盤點最辛苦「炒散」經歷  邊3個行業最地獄？

正所謂「個個都返工，唔通個個都想返工咩？」為了增加收入， 累積工作經驗， 好多人都嘗試過返兼職或者炒散，未做過真的未必能體驗箇中苦況 。近期網上討論區就有網民以「人生做過最辛苦的part-time是邊份？」為題收集網民的經歷，引來網民紛紛回應，不少網民大嘆辛苦，但也不得不佩服從業員的毅力，今次就來盤點網民討論度最高的3大最地獄行業！

{{hket:inline-image name="20210719WLfeaturepageOK3.jpg"}}{{/hket:inline-image}}

笫三位：零售業

網民A：「返尖沙咀快速時裝店，由4點返到11點，OT到12點幾，都無放飯時間。客人試完鞋又唔識掛返上去，我成日要踎低逐對執起，返過呢份先發覺原來其他part time可以咁輕鬆。」

網民B：「收工前係咁執返好個場，接返整齊啲衫褲，返大貨嗰時每次OT 2-3個鐘，執倉都執死人！」

第二位 : 搬運/倉務

網民C：「做機場執貨，肺炎高峰期之後開返運輸，好多貨上落，嗰時以為自己可以當做吓運動。點知無停過搬咗8個鐘（除咗1個鐘放飯），完咗之後feel到自己癱咗，返屋企即刻訓咗成日。」

網民D：「試過Part Time過一日送水，無用汽水車，第一轉要送8支水，送完已經手軟，師兄見我咁，叫我第二轉送少兩支。勉強頂到午飯時間，飲例湯嗰陣，連匙羹都拎唔起，要壓低個頭飲。頂埋個下奏差啲唔掂，最後返咗一日就唔做，好敬佩佢哋。」

網民E：「試過不停入倉爬上爬落拎鞋，仲要幫手執倉，做到暈。」

第一位 : 飲食業

{{hket:inline-image name="20210719WLfeaturepageOK2.jpg"}}{{/hket:inline-image}}

網民F：「某酒店中菜炒散，啲碗碗碟碟好重，成個場得我一個炒散，又無人幫我手。做咗13個幾鐘，食得15分鐘飯，真係做到痴線。」

網民G：「返酒店炒散洗碗，推啲碗去高溫蒸，好似係個蒸爐到做嘢，好熱好想暈。」

網民H：「酒樓樓面，做咗成日都無休息過，最記得攞條魚唔夠力，差啲跌，但無人幫我手，好彩順利放到入房。」

網民I：「做過台式飲品兼雪糕店，全日得我一個人返，清潔、整配料、雪糕、嘢飲都係我一個人做晒。仲要無飯鐘，要一邊食飯一邊沖嘢飲。」

網民J：「以前中學生去做連鎖快餐店，見工話請廚房幫工，實質就係去洗嘢/收鋪，全部嘢都用手洗，衫褲仲要自己帶返屋企洗。」

編輯：馮思嫚

接收全方位穩健財富管理資訊，請讚好「健康財富 Wealthy Life」Facebook：https://fb.com/Wealthylifehk/