人氣組合MIRROR成員柳應廷（Jer）去年推出「物語三部曲」大獲好評，今年他再下一城，與小克、王雙駿（Carl叔叔）等同一班底打造全新系列「重生三部曲」，繼第一部曲《狂人日記》後，早前推出第二部曲《砂之器》。Jer希望藉歌曲帶出一個課題，讓大家思考與身邊人的關係。他更直言出呢首歌之前都有擔心聽眾未必消化到首歌嘅訊息，「但我估唔到大家反應都好好，我都好開心可以繼續做咁有深度嘅歌畀大家聽！」
《砂之器》承接《狂人日記》，此生課題為「宿命和原諒」。歌詞以親情為題材、「今生情侶，下世母子」包裝，講述前世情人約定來生以母子相見，即使角色更改，血脈依然相連。
Jer希望歌曲令人有所反思：「當你經歷狂人的一生，你破壞所有關係時，你也需要對自己或對身邊的關係作出交代。面對這些關係時我會選擇去講對不起，及希望對方原諒我。無論是狂人那一世或是重生到今年的母子關係，都要有一聲道歉。我知道嗰一句道歉唔容易開口，好多網友都留言話自己同屋企人關係好差，呢句『對唔住』唔似歌中一句『對唔住』咁容易開口，純粹想帶出一個課題讓大家思考與身邊人嘅關係。」
《砂之器》出街後獲大迴響，不少網友更留言指聽歌後令自己反思與母親的關係，Jer直言這已達到他做音樂的目的。「我聽到好多媽媽，尤其係生咗小朋友嘅網友對於歌曲感受特別大，係聽到呢首歌之後得到啟發。有好多人話自己同媽媽關係唔太好，到面對住自己小朋友嘅時候都唔希望重蹈覆轍，從而想修補同媽媽嘅關係。我本身做歌曲就希望給予身邊人力量，覺得首歌已經好成功。」
Jer直言聽眾對歌曲的熱烈反應是他始料未及的，皆因他自己都曾猶豫應否繼續做難度如此高的歌曲；而經理人花姐（黃慧君）一開頭亦對這首歌好冇信心，「佢覺得好難，剩係睇歌詞都唔識解，要查字典。佢覺得係咪要去到咁難呢？」
他憶述在收到小克的詞後，自己亦需要時間去消化，「一開頭自己都有challenge自己應唔應該繼續去做咁難嘅歌，聽眾會唔會消化到首歌嘅訊息？花姐、公司又消唔消化到？到後期有一次係小巴聽歌，電台就響起咗《狂人日記》呢首歌，好似係暗示叫我繼續做呢首歌啦！但我估唔到出完呢首後大家反應都好好，原來唔係想像中咁難消化，咁我都好開心可以繼續做咁有深度嘅歌畀大家聽！」他亦指花姐見到新歌獲大迴響，「佢應該係會繼續放手畀我去做呢樣嘢！」
提到歌曲與日本作家松本清張小說《砂之器》同名，Jer就指︰「其實今年同Carl叔叔同小克做第一首《狂人日記》，已經講定下一首歌都用小說名。無意間呢個小說名又好襯我想講嘅故事，講宿命、對親人嘅關係，覺得用喺呢首歌入面好啱。嚟緊第三首歌名可能都係用文學作品，但就未confirm係咩名。」他指《砂之器》以心靈書籍《零極限》頭兩式「對不起，請原諒我」為題材，而下一首歌則是與書中後兩式「我愛你，謝謝」有關。
提到今次MV當中一幕喊戲，Jer坦言全靠家人打開淚腺，「拍一場喊戲係需要好多層次，唔係想像中咁容易。我記得第一次拍《水刑物語》MV，花姐叫我對住海邊喊，話我喊到㗎。不過今次係現場聽到這首歌，五分鐘左右就可以代入情緒喊到。拍《水刑物語》時就要多20倍時間去蘊釀情緒。」
歌中提及母子關係，Jer現實中與媽媽關係又是怎樣的？他笑言兩人關係當然無歌詞所言般沉重，「未去到離家出走，但同媽咪間唔中都有鬧交。比較sweet多啲。」而《砂之器》當中有一句令他感受好深，「共鳴感最強係歌曲最後段『望母親 突然白了首』，唱嘅時候諗返起自己呢幾年因為工作，而少咗時間陪屋企人，睇住佢哋慢慢老去，都想為這個關係做多啲嘢。」
Jer又指自己有時對媽媽語氣很差，但「對不起」這句說話始終難以啟齒，「有時對媽媽語氣很差，令佢嬲到幾日唔同我講嘢。幾日後我會同佢講『唔好嬲啦』，但又唔係講對唔住，純粹係𠱁佢，但佢兩下就被我融化。」他自言份人比較硬頸，很少會說對不起。「我會用行動去表示歉意多過直接說『對唔住』，我對住自己所愛的人反而難以開口講『我愛你』；而對於一些我做錯事要道歉嘅人，未必第一時間講到『對唔住』。」
而提到他最深刻的一句對不起，是隊友Anson Kong（AK）在《調教你MIRROR》說的那一次，「那句『對唔住』去到現在，甚至將來我都會記得。因為嗰個moment好重要、好深刻。『對唔住』真係唔容易開口，所以我好記得。」
提到之後，Jer指自己會有演戲方面嘅嘗試，更想挑戰配音工作。「除咗拍劇，自己亦想挑戰配音，想幫動畫配音，最好電影入面都可以畀我唱歌，會想陸續挑戰唔同方面嘅自己。」
服裝：Celine、Giuseppe Zanotti
造型：PIPA Creative
髮型：Man Chan@CHIC Private i SALON
化粧：Giann Cheung @Annie G. Chan Makeup Centre
撰文：林惠珊
攝影：黃紫維、王華婷
Mirror成員Jer︱柳應廷玩街頭音樂體會搵食艱難 《全民造星》找回初心拒再當齒輪 【下一頁】
U Lifestyle App自家節目登錄《U TV》專區！
↓↓試玩、試食、試用影片任你睇↓↓