【聲明】港生活網站並無進行電話推廣活動

《殺出個黃昏》謝賢林家棟 原來殺手好玩得

發佈時間: 2021/07/23

現年84歲的謝賢(四哥)早前「出山」拍攝新片《殺出個黃昏》,四哥指拍攝過程相當好玩,但就因為一個原因,拒絕跟兒子謝霆鋒父子檔上陣;至於《殺》片監製林家棟,軟硬兼施才請得郁四哥再登大銀幕,他大爆四哥拍講粗口鏡頭勁流利一take過,卻被一句三級俗語考起,結果家棟花盡唇舌給四哥解釋,最後才順利拍攝。

謝賢與林家棟日前結伴受訪,家棟談到如何邀請四哥出山即滔滔不絕,「口水固然要花,我話有好多觀眾同四哥一齊成長,而唔認識佢嘅觀眾都好想認識佢,咁係咪要除低副眼鏡見下人先?我哋梗係講啲好聽嘅說話,四哥心花怒放,咁咪成功囉!不過,我都要招呼四哥啲朋友,佢哋同我講『唔好打爛四哥個招牌喎』,我話唔會。四哥啲朋友好錫佢,唔想四哥咁多年嘅『壇數』臨尾『搞彎晒』;當然,開工時蛋撻、雪茄梗係唔少得,四哥咁就入局喇,我先係千王之王,哈哈!」四哥在旁笑謂︰「畀佢𠱁咗呀!」

開心重遇馮寶寶

最令四哥開心的,就是有緣跟馮寶寶相隔60年後再次合作,兩人再見時惺惺相惜,四哥忍不住話當年。「同寶寶好耐無合作,當年佢好似得四歲,真係手抱住佢;到佢十幾歲時,去咗英國讀書返嚟就同我拍戲,轉眼間就60年。咁耐以嚟我都好錫佢,當佢係我個女咁。」四哥又說:「總之我同邊個拍戲都好好,個個老拍檔都想再合作,個個都係朋友嘛!」不過馮寶寶早已移居馬來西亞,她拍畢電影後亦已返回當地,故兩人未有交換聯絡方式,認真可惜。

四哥直言,早已忘了自己有多少年無拍戲,自封「消遙浪子」的他笑言,「有得玩就玩,最緊要每日開心,佢哋搵我拍戲,我咪當玩。」家棟亦大讚四哥這位演員很聽話,「準時係必然,佢唔收OT錢呢下好,完全唔計較,有時拍遲咗,佢都無講過一句,但有時同佢講收工,佢會話『下,走喇?無嘢撈喇?』佢好享受喺片場同朋友、工作人員拍嘢。」兒子謝霆鋒近年在影圈的成績有目共睹,但四哥甚少看兒子的演出,亦婉拒父子檔合作。「我唔睇佢啲戲!我都無戲做,你做晒啲戲,留啲畀老竇做。我唔同佢拍,佢威過我咪大劑,依家唔知佢威唔威過我㗎嘛!真係無諗過(合作),佢真係好忙,依家仲喺大陸,呢兩年都唔返嚟,我兩年無見過佢,電話聯絡都好少,除咗我生日會打嚟講兩句,如果有人搵我哋拍戲先再講啦!」

講粗口拍感情戲

家棟表示四哥在《殺》片中有句粗口對白,「四哥擔心效果如何,我話導演識處理。呢句對白係三個字嘅粗口,我話拍咗先,唔得就剪咗佢,其實嗰場係感情戲,要四哥講粗口都幾爆,但出到嚟又出奇地好睇,仲要一take過。」家棟忍不住繼續爆料,「四哥有句對白係新派嘅三級俗語,佢NG咗好多次,因為演員唔明白個含義就好難演繹。但我好少出嚟蒲,起初都唔知句俗語點解㗎!」四哥則陰陰嘴笑說,「依家我知呢句嘢點解啦,即係『𡁻完鬆』嘛,呢句說話係我十幾歲時啲老人家講嘅。」

採訪︰倪小珊

攝影︰林良明

美術︰梁政敏

《殺出個黃昏》謝賢林家棟 原來殺手好玩得

家棟(右)風趣幽默,在訪問中多次𠱁得四哥笑逐顏開。

《殺出個黃昏》謝賢林家棟 原來殺手好玩得

四哥和馮寶寶相隔60年後再次合作,在電影中擦出不少火花。

《殺出個黃昏》謝賢林家棟 原來殺手好玩得

四哥經常邀請家棟和工作人員到家中享受鮑魚等美食。(資料圖片)