萬眾期待的東京奧運會今日揭幕，雖然受疫情影響，這項體壇盛事比原定舉行時間押後了一年，但仍不損體育迷的熱情。其實圈中也有不少藝人精通運動，有的更贏過獎牌，相當威水！未知他們最期待哪些奧運項目？對哪些昔日奧運片段最印象深刻呢？
身為前乒乓球港隊成員的陳展鵬，除了對乒乓球項目感興趣，港隊的強項單車也是他的必看項目，「總之有香港運動員出賽嘅項目，我都一定支持！」展鵬認為奧運代表着「團結」，希望奧運賽事能夠產生催化作用，為全球打氣。曾是運動員的他，十分明白運動員的「壽命」有限，非常難得才有機會參與國際性比賽，所以任何選手都值得支持。
另外，對於今年能與兩歲囡囡小豬比一起觀看奧運，展鵬大感興奮和期待；他又認為小朋友要有適當的運動量，他笑言︰「如果個女鍾意打乒乓波我一定會教佢，不過我都會畀佢決定想學咩運動，呢啲無得強迫，運動要自己鍾意嘅。」
蕭正楠︰唔識跳水所以更想睇
本身熱愛足球的蕭正楠（Edwin），問到會否對奧運的足球項目感興趣？Edwin竟說︰「今年已經好多足球賽事睇，有歐國盃、美洲國家盃，所以奧運反而想睇跳水，因為運動員表演花式動作好吸引，同埋自己做唔到嘅嘢就更加想睇。」
說到最難忘的奧運時刻，Edwin認為是1988年漢城奧運的男子三米彈板跳水項目，他憶述︰「當時美國跳水王子盧根尼斯跳落嚟，撞到個頭流晒血，都幾得人驚，但係佢依然攞到金牌，之後又有好大爭議，所以印象好深刻。」
劉佩玥︰因父之名愛上排球
身形高瘦的劉佩玥（Moon），中學時曾是校內排球隊的成員，她說︰「我會打排球係因為爸爸，一路都好想好似佢咁叻，所以自己都想試下，我依家最鍾意睇嘅運動項目都係排球。」Moon又表示，希望能與父母一同收看東奧的排球比賽直播，而她最喜歡中國女排隊，「每次睇中國女排比賽都好緊張，就好似自己落場打波咁。我同爸爸一定會一齊睇波，始終大家都鍾意排球，可以一邊睇，一邊分析嗰場比賽同每個球員嘅狀態。」
余德丞︰難忘巴西奧運熱烈氣氛
曾是香港游泳代表隊成員的余德丞（Dickson），他直言今屆奧運會特別留意香港女泳手何詩蓓，「佢今年絕對有機會攞牌，其實我上屆喺巴西採訪奧運都睇過佢游水，已經覺得佢好有機會，如果香港運動員可以攞到獎牌真係一件好開心嘅事。」Dickson又難忘五年前採訪奧運時，於容納十萬名觀眾的球場欣賞男子足球決賽，氣氛相當熱烈。不過今年東奧因疫情而被迫閉門作賽，Dickson認為十分可惜︰「始終運動員都想有觀眾支持自己，最慘係申請做義工嘅人，無辦法親身參與呢個盛事。」
採訪︰Pauline
美術︰梁政敏