萬年惡人│「生番」陳志輝坦蕩爆影壇血淚史 李修賢公報私仇玻璃樽監生插肚

人稱盲輝嘅陳志輝，初入行做演員替身及飛車特技演員，《旺角卡門》和《英雄本色》中被周潤發打敗的的黑道人物係佢嘅早期作品；後來多數都演「得舖蠻力」嘅黑社會，做「萬年奸角」，於電影《古惑仔之戰無不勝》中演生番一角喺觀眾心中留下深刻印象。近年已經冇拍戲嘅佢日前接受YouTuber Hebe嘅訪問，同大家分享昔日拍戲超過40年嘅血淚史，勾起唔少集體回憶。

{{hket:inline-image name="1.JPG"}}{{/hket:inline-image}}

唔經唔覺，生番哥今年已經69歲，近年都過住健康生活，熱愛單車運動嘅佢不時都畀「單車友」撞到要求合照。佢指當年拍《英雄本色》時印象非常深刻，因為當年為咗節省成本，枱面上嘅食物擺咗足足一個星期，已經開始發臭。生番哥雖然「惡形惡相」，但真人非常友善爽快，佢指娛圈係一個大染缸，但做人要「揸緊宗旨」，唔應該做嘅佢唔會做。佢舉例「御用惡人」何家駒，係當年嘅大學生，仲操流利英語，前途無限；但最終因為染上毒癮，事業一落千丈，人人避之則吉。

{{hket:inline-image name="php7tSy3z.jpg"}}{{/hket:inline-image}}

生番哥講到娛圈中佢最鍾意合作嘅就係周潤發，而四大天王中佢最鍾意就係郭富城，都曾經多次同張學友及劉德華合作，唯獨黎明佢就話因為當年拍戲見過對方「真面目」後就唔多鍾意：「 佢嗰時都唔係太紅，拍《妖獸都市》，嗰時佢溝李嘉欣……呢套嘢喺深灣遊艇會拍，突然間走咗5、6個學生妹入嚟想同佢合照，天王就話：『你哋畀心機讀書，追明星冇前途』，之後就鬧工作人員放佢哋入嚟。」生番哥話自己當時直接當面話佢「好X假」，認為可以婉拒人，而唔係鬧工作人員。生番哥知無不言，話自己係「講事實唔係講是非」；佢又指周星馳都係鏡頭前後兩個樣，鏡頭後嘅佢非常安靜，一句起兩句止。

生番哥指星爺對自己要求高，但對二、三線演員唔會要求太高，曾有指星爺喺片場鬧人，生番哥都撐星爺都係只會為工作而鬧。 佢又大爆李修賢鬧人唔係用口，係用咪鬧：「『喂你好渣呀，幾百人等你NG呀！』佢（爆咪）鬧我老友盧惠光，盧惠光好好脾氣……佢（李修賢）係人都鬧，係唔敢鬧我同大傻（成奎安）。佢鬧我我咪劈炮唔撈，佢會搵大傻氹番我，大傻係跟佢拍《皇家飯》捧紅。」

生番哥憶述自己當時有一次畀李修賢搞到罷工：「有一場戲我同李修賢對打，台灣老細畀錢佢（李修賢）拍，但佢揸住雞毛當令箭，當時係田雞（田啟文）搵我拍，我話加倍人工，係畀佢鬧嘅！之後佢亂改戲打我，我同武指講，下場我打佢都唔使度，我識點打佢，之後畀佢聽到，就話：『唔使，一陣場戲改做我隊你一刀。』我嗰時畀人恰，好慘……武指同我講，一陣着pad好喎，我話唔使，糖膠玻璃樽咋嘛，指導話真樽呀，因為買唔切（糖膠玻璃樽），我話都唔驚丫，佢一隊埋嚟我褪走咋嘛。」當時李修賢都話自己會借位，但武師強烈建議佢唔好博，唔着pad有機會命都冇！而到正式拍攝時李修賢真係冇借位，插入咗生番哥肚嘅一個指關節嘅深度，時至今日都可以見到疤痕。

生番哥即時一腳踢開李修賢，李修賢解釋自己當時太入戲：「佢（李修賢）記仇，我話佢寸，佢有心報仇。嗰次我鬧佢鬧盧惠光，盧惠光咁好脾氣都畀佢鬧走，有冇搞錯！嗰陣盧惠光廣東話唔好，但講錯一句對白畀佢問候老母。」生番哥原想罷拍，最後畀面大傻都完成咗場戲。

同場加映：  星格Boss｜林秀怡開美容院無預男友免拗撬 「一個唔好彩分手 間嘢點算？」

{{hket:ul-video id="3668"}}{{/hket:ul-video}}

U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】