《阿囡又戀嚟》

前幾日與幾個女同事食飯，話題都是普通八卦和時事，突然有位同事提起ViuTV最近新推出的綜藝《阿囡又戀嚟》，本來各自做低頭族的同事突然開始雞啄唔斷，「呢個又大隻又靚仔啊」、「嗰個幾好，就係衰在太矮」、「呢個好似都好得喎」，望住一班渴望愛情滋潤的女士們在評頭品足，一時皺眉一時又雙眼發光，實在有趣。

節目找來幾個單身女仔連同她們的父母，進行一場戀愛實驗，簡單來說就是相睇節目。

但有趣的地方是，阿囡可以同時與兩個男仔約會，一個由父母揀，一個由阿囡自己揀，看看最後哪個可以抱得美人歸。

對於父母之命和自由戀愛，一眾女同事都相當踴躍發表意見。有人認為拍拖只是為了開心，無需太多顧慮；有人係「外貌協會會長」，講到明只要靚仔；有人又認為拍拖最終為結婚，男仔要有一定的經濟能力；亦都有人強烈反對父母介入自己的感情，認為自己男友應該自己揀……

究竟拍拖要睇樣、睇性格、定睇錢？我諗無一定答案嘅，都係各花入各眼啦。至於父母嘅亂入，正所謂「可憐天下父母心」，只能夠唱句「矛盾只因心愛着」啊。

（本欄逢周一刊登）