薛家燕為學生組女團受阻

薛家燕、汪明荃及《聲夢傳奇》學員等昨午到沙田出席活動，《聲夢》學員鍾柔美（Yumi）是家燕姐的音樂學校學生，二人昨日同場現身，家燕姐對學生成長大感高興。可會考慮為學生組一隊女團？家燕姐說︰「好想，但我好注重佢哋學業，今期有兩個學員唱跳都好叻，但家人想佢哋去外國留學，我唔想阻佢哋前途。」家燕姐又稱近日多了不少人報讀音樂學校，年紀最小更只得四、五歲。

會否推薦學生出戰第二屆《聲夢傳奇》？家燕姐稱︰「我知有好多學生參加，但自己無推薦！」她強調不想因自己與無綫的關係助他們入圍︰「我有同佢哋講參賽唔一定成功，係攞經驗。」此外，汪明荃提到活動展出自己當年不少經典劇照，她笑說︰「我無特別攞出嚟，佢哋有好多，早前喺理工大學都做過展覽。」