離巢無綫即歎世界 何雁詩下周飛美國補度蜜月

何雁詩（Stephanie）前晚在社交網宣布離開TVB，回復自由身的她，首個「重要任務」就是度蜜月。Stephanie昨日接受《晴報》訪問時，透露下周將做「跟得夫人」，陪老公鄭俊弘（Fred）到美國登台，順便補度蜜月，兩公婆更會玩足一個月才返港，認真開心。

09年，年僅16歲的何雁詩參加第一屆《超級巨聲》入行，她前晚上載一張在TVB門外的照片，宣布正式離巢︰「估唔到我人生第一份工一做就做咗12年，由中學畢業到結婚，都喺呢間公司度過，我所有關於呢一個行業嘅知識，都幾乎完全喺TVB學習番嚟，不過，呢個世界係好大㗎，有好多地方、事情我都仲未見識過，同埋需要學習。我都係時候跳出自己嘅comfort zone，去出面嘅世界學習一下。」Stephanie感謝舊同事和經理人的照顧和包容，她說︰「仲有各位一齊捱通頂，一起笑一起燥嘅兄弟姐妹們，多謝你哋畀我嘅所有回憶，江湖再見！」圈中好友陳嘉寶、劉珮玥及陳敏之等都祝她一切順利。

暫未計劃造人

正式告別娘家，Stephanie昨日接受本報訪問時，坦言十分不捨︰「始終喺TVB咁多年，最唔捨得公司出名嘅叉雞飯，當然好多同事都唔捨得，佢哋好多都睇住我入行。」雖然約滿後有多間公司向她招手，但Stephanie卻堅持靠自己︰「上年自己開咗間公司做歌，暫時都會用番呢間公司做住先，不過有任何啱傾嘅公司，都唔排除合作。」

Stephanie指老公Fred十分支持她的決定，問她回復自由身後最想做甚麼？她高呼︰「我好想去旅行呀！」隨即自爆下周跟Fred到美國補度蜜月，她興奮說︰「Fred會去美國同鍾嘉欣登台，我就跟埋去，順便補番個honeymoon，我哋會周圍去玩，加埋隔離，預計去一個月。」她透露和Fred已打齊疫苗，也會做檢測，至於會否順道造人？她表示暫時未有計劃。

撰文︰倪小珊

美術︰梁政敏