【聲明】港生活網站並無進行電話推廣活動

被劇本感動甘願減片酬 吳君如演蘇樺偉母親喊到攰

發佈時間: 2021/07/30

由吳君如、梁仲恆(阿炳)、張繼聰及胡子彤等主演的新片《媽媽的神奇小子》將於下月12日上映,故事根據殘奧徑賽金牌得主蘇樺偉的真人真事改編,帶出蘇樺偉和媽媽的奮鬥故事;今次君如一改手到拿來的喜劇本色演出,反而飾演蘇媽媽這個既堅強又沉重的角色,君如深受劇情感動,難怪減掉三分二酬勞亦在所不計。

吳君如日前與飾演年輕版蘇樺偉的梁仲恆一同受訪,身兼電影監製及主演的君如,對於今次拍攝以運動勵志為題材的電影,她說︰「古天樂介紹導演尹志文畀我識,我同導演磨合咗一輪劇本就OK,古天樂就話『我出錢你出力』,其實拍運動片同歌舞片一樣都係好冒險,但我哋好想喺呢兩年拍一啲勵志嘅電影…今次投資咗幾千萬,資金唔平,又多特技,我都cut咗好多導演要用嘅場面,擺多啲錢喺跑步場面上。」落實開拍後,君如和阿炳分別與蘇媽媽和蘇樺偉「攞料」,君如表示︰「我同蘇媽傾咗好多次,講到心底話,蘇媽都好感觸,知道佢以前照顧樺偉好艱辛,我只係想攞佢嘅感覺去化成呢個角色,我唔係模仿佢,但知道佢呢啲經歷,我就自自然然會好似佢。」

蘇媽媽回憶湊仔辛酸

拍攝期間,蘇媽媽到片場探班時看到君如演出,令她感觸萬分。君如說:「我哋拍番佢以前住嘅屋邨單位,還原一比一嘅擺設,蘇媽話直情搭到一模一樣;當年蘇媽一個人湊兩個小朋友,又要煮飯掃地,樺偉唔識行,要孭住佢嗰啲辛酸,蘇媽話真係百般滋味在心頭。蘇媽同我講『我咁辛苦都捱過,依家你問我,我都唔知當時點湊大啲細路』,但佢都捱到過嚟,佢仲話驚睇套戲會睇到喊,我話你喊硬。」

電影感人場面多多,君如直言每天開工都十分疲累。「我真係由頭喊到落尾,每日保持好悲慘同憤怒嘅狀態,開工開到好攰;最深刻係有場同阿炳嗌大交,演到心臟病發,導演話如果我喊唔出,就滴啲假情假意(眼藥水),或者大巴大巴咁摑我!」今次為真人真事改篇的電影出任監製,主人翁更是港人熟悉的人物,君如坦言︰「今次唔係我嘅賀歲片同商業片強項,所以擺咗好多心血落劇本。」她又笑說︰「古仔話錢就咁多,你自己睇餸食飯,咁我覺得係合理嘅,再加落去係無底深潭。(有減片酬?)梗係有啦,起碼都減咗三分二,不過呢個係我想做嘅嘢,又有意義,無乜所謂啦!如果over咗個預算,咪喺我度攞囉!」

梁仲恆約蘇樺偉跑步

阿炳扮演蘇樺偉非常神似,獲君如及導演一致激讚,全賴他開拍前不時相約樺偉見面。「我同佢一齊跑步、打機,但我無刻意『撩』佢講自己嘢,因為佢嘅故事喺佢本自傳已經交代,我反而想吸收多啲佢日常生活嘅舉止同形態,電影唔係真係100%紀錄片,所以有啲創作可以自己填補,呢份功課留番畀我自己,唔需要喺樺偉嗰度煉出來,我自己都結構到。」他指飾演樺偉最大難度是說話方面︰「平時佢講嘢,真係要好畀心機先聽到,但做戲唔可以,要觀眾聽得明,又唔可以失去佢講嘢嘅神髓,所以事前我哋同導演用咗好多努力搵出方法。」

髮型:Seiko Sin@Hair Culture

化粧:Midco Chu

撰文︰倪小珊

攝影︰Alma

美術︰梁政敏

被劇本感動甘願減片酬 吳君如演蘇樺偉母親喊到攰

君如和梁仲恆為演好母子角色,不斷琢磨演技,可謂絞盡腦汁。

被劇本感動甘願減片酬 吳君如演蘇樺偉母親喊到攰

君如拍畢電影後,與蘇媽媽和蘇樺偉感情昇華猶如親人。(IG圖片)

被劇本感動甘願減片酬 吳君如演蘇樺偉母親喊到攰

新片重現蘇樺偉在殘奧男子4×100米接力賽上衝綫奪金的一幕。(影片截圖)