被劇本感動甘願減片酬 吳君如演蘇樺偉母親喊到攰

由吳君如、梁仲恆（阿炳）、張繼聰及胡子彤等主演的新片《媽媽的神奇小子》將於下月12日上映，故事根據殘奧徑賽金牌得主蘇樺偉的真人真事改編，帶出蘇樺偉和媽媽的奮鬥故事；今次君如一改手到拿來的喜劇本色演出，反而飾演蘇媽媽這個既堅強又沉重的角色，君如深受劇情感動，難怪減掉三分二酬勞亦在所不計。

吳君如日前與飾演年輕版蘇樺偉的梁仲恆一同受訪，身兼電影監製及主演的君如，對於今次拍攝以運動勵志為題材的電影，她說︰「古天樂介紹導演尹志文畀我識，我同導演磨合咗一輪劇本就OK，古天樂就話『我出錢你出力』，其實拍運動片同歌舞片一樣都係好冒險，但我哋好想喺呢兩年拍一啲勵志嘅電影…今次投資咗幾千萬，資金唔平，又多特技，我都cut咗好多導演要用嘅場面，擺多啲錢喺跑步場面上。」落實開拍後，君如和阿炳分別與蘇媽媽和蘇樺偉「攞料」，君如表示︰「我同蘇媽傾咗好多次，講到心底話，蘇媽都好感觸，知道佢以前照顧樺偉好艱辛，我只係想攞佢嘅感覺去化成呢個角色，我唔係模仿佢，但知道佢呢啲經歷，我就自自然然會好似佢。」

蘇媽媽回憶湊仔辛酸

拍攝期間，蘇媽媽到片場探班時看到君如演出，令她感觸萬分。君如說：「我哋拍番佢以前住嘅屋邨單位，還原一比一嘅擺設，蘇媽話直情搭到一模一樣；當年蘇媽一個人湊兩個小朋友，又要煮飯掃地，樺偉唔識行，要孭住佢嗰啲辛酸，蘇媽話真係百般滋味在心頭。蘇媽同我講『我咁辛苦都捱過，依家你問我，我都唔知當時點湊大啲細路』，但佢都捱到過嚟，佢仲話驚睇套戲會睇到喊，我話你喊硬。」

電影感人場面多多，君如直言每天開工都十分疲累。「我真係由頭喊到落尾，每日保持好悲慘同憤怒嘅狀態，開工開到好攰；最深刻係有場同阿炳嗌大交，演到心臟病發，導演話如果我喊唔出，就滴啲假情假意（眼藥水），或者大巴大巴咁摑我！」今次為真人真事改篇的電影出任監製，主人翁更是港人熟悉的人物，君如坦言︰「今次唔係我嘅賀歲片同商業片強項，所以擺咗好多心血落劇本。」她又笑說︰「古仔話錢就咁多，你自己睇餸食飯，咁我覺得係合理嘅，再加落去係無底深潭。（有減片酬？）梗係有啦，起碼都減咗三分二，不過呢個係我想做嘅嘢，又有意義，無乜所謂啦！如果over咗個預算，咪喺我度攞囉！」

梁仲恆約蘇樺偉跑步

阿炳扮演蘇樺偉非常神似，獲君如及導演一致激讚，全賴他開拍前不時相約樺偉見面。「我同佢一齊跑步、打機，但我無刻意『撩』佢講自己嘢，因為佢嘅故事喺佢本自傳已經交代，我反而想吸收多啲佢日常生活嘅舉止同形態，電影唔係真係100%紀錄片，所以有啲創作可以自己填補，呢份功課留番畀我自己，唔需要喺樺偉嗰度煉出來，我自己都結構到。」他指飾演樺偉最大難度是說話方面︰「平時佢講嘢，真係要好畀心機先聽到，但做戲唔可以，要觀眾聽得明，又唔可以失去佢講嘢嘅神髓，所以事前我哋同導演用咗好多努力搵出方法。」

髮型：Seiko Sin@Hair Culture

化粧：Midco Chu

撰文︰倪小珊

攝影︰Alma

美術︰梁政敏