電子消費券｜「阿茂」買蝦餃派街坊 消費券到手未夠一日已「使凸」

由今年財政預算案提出派發的5,000元電子消費券，全港約550萬名市民等咗半年，第一期的2,000元消費券終於今早派發。預算案諮詢期間化身「整餅阿茂」嘅財政司司長陳茂波，今早到酒樓以消費劵買咗30籠蝦餃請市民食，仲親自推點心車派畀街坊，喺廚房「出發」前仲笑言「希望佢哋(市民)畀面，好緊張呀」。

「阿茂」另外又去咗一間茶餐廳同市民傾偈，問起大家打算點用消費券，有市民就好興奮話「食晒佢」。司長之後又「客串」做收銀員，用二維碼支付幫手收錢，又大讚「(電子支付)真係好方便！」

阿茂去酒樓茶餐廳有咩得着？一按放大睇

另外今日係「全民運動日2021」，司長食飽飯又去咗同學生打籃球同打乒乓波，出發前又再用消費劵買定水樽毛巾送畀同學仔。

波叔打波打成點？一按放大睇

派完蝦餃又買咁多禮物，埋單計數，司長都話「#2000元已使凸」，不過「#最緊要齊齊消費帶旺經濟」。

消費券帶動下，新地料旗下商場人流生意升2至4成，電子產品珠寶熱銷，有客買$11萬名錶，詳情即睇【下一頁】

撰文：李卓謙
責任編輯：陳浩義