【聲明】港生活網站並無進行電話推廣活動

慘遭淋屎 黃翠如呻味道難頂

發佈時間: 2021/08/06

黃翠如昨日宣傳無綫新劇《七公主》,劇中慘遭林夏薇潑「道具屎」的翠如,揚言被淋屎的感覺絕不好受。由於道具屎由朱古力和香蕉溝成,質感幾可亂真,翠如透露拍畢後要即時回家由頭洗到落腳,認真慘烈。

黃翠如、林夏薇、高海寧、陳瀅及鄺潔楹等昨日到新蒲崗宣傳下周一首播的《七公主》,翠如表示在劇中連續被淋屎兩次,其中一次因位置不準確而要遭受多一次「酷刑」,她說︰「其實拍完之後我已經即刻用毛巾抹身,係乾淨咗少少,但成身都啡晒,個身亦好多味道,個質感實在太似,淨係想快啲拍完。」拍畢該場戲後,翠如即駕車回家洗澡,期間更將自己包到冚,以免弄污座駕。至於「行兇」的林夏薇則表示角色是她入行以來最突破的一次,她說︰「戲入面我同徐榮除咗係畸戀,仲有親熱戲,係入行以嚟最激。」

至於劇中飾演武俠小說作家的高海寧,經常幻想成為小說主角,所以有百變造型,她興奮表示︰「有幾十套靚衫,我成日都要cosplay,好似《美少女戰士》嘅『天王遙』,又有得着旗袍。」相對於高海寧,陳瀅整套劇只穿一套衫和一對爛波鞋,她形容角色是一無所有,沒有手袋之餘,僅拿着一個膠袋,她笑指︰「差在未瞓街咋!(無晒女神形象?)預咗無。不過我預告咗先,拍呢套劇時啱啱隔離完,所以個人脹咗。」陳瀅又否認和周嘉洛的緋聞,她指可能兩人都是單身,所以容易惹緋聞。

陳瀅預告無女神形象

至於身材嬌小的鄺潔楹(Judy),在劇中飾演業餘劍擊手,她透露拍劇前特訓了四個月,她說︰「我有成功拮到個男對手㗎,佢高大過我,得到分算係咁。」提到劇集因「193劍神」張家朗在奧運奪金,所以獲提前播出,Judy開心道︰「多謝張家朗,希望佢哋都會睇呢套劇啦!」

採訪︰倪小珊

美術︰梁政敏

慘遭淋屎 黃翠如呻味道難頂

(左起)陳瀅、黃翠如、林夏薇、高海寧及江嘉敏大擺劍擊英姿。