港乒女團奪銅 陳展鵬感動流男兒淚

陳展鵬昨日到奧海城出席「齊撑香港運動員」活動，身為前乒乓球港隊代表成員的他，透露昨天特別提早起床支持港隊乒乓女子團體銅牌賽，他更自爆睇到激動落淚︰「真係毛管戙，要去到嗰個水平係好難，香港隊真係好犀利，場場都睇到咬牙切齒，好引以為榮！」

提到港隊教練李靜爆粗指導杜凱琹成為熱話，展鵬指自己當年以青年軍身份四處集訓，當時教練並不兇惡，他笑指︰「因為我同教練係福建人，所以大家係咁福嚟福去。（有無畀人鬧？）咁又無，我13、14歲開始訓練咗幾年，但成績都係掹車邊，教練都畀唔到太多壓力我，跟住我17歲就已經退隊。」不過展鵬明言除了想讓女兒「小豬比」接觸乒乓球，他亦希望囡囡玩劍擊。