【聲明】港生活網站並無進行電話推廣活動

爆囝囝無聽自己歌 張繼聰呷MIRROR醋

發佈時間: 2021/08/06

張繼聰(阿聰)的兒子張瞻是人氣男團MIRROR的粉絲,阿聰前晚出席電影首映禮時,透露囝囝在12子中特別喜歡柳應廷(Jer)。雖然阿聰同為歌手,但他卻大爆兒子沒有聽自己的歌,反而歌單大部分都是MIRROR和Jer的歌曲,令阿聰十分「葡萄」。

張繼聰前晚出席電影《媽媽的神奇小子》首映禮,他在戲中飾演跑步教練,與吳君如有多場對手戲,阿聰直言十分欣賞君如的專業,又大讚對方是自己尊敬的演員,他說︰「私底下嘅君如係一個無得頂嘅人,我都要向佢多多學習,君如會不停突破自己,雖然佢好有經驗,但都會問我哋嘅意見。」

老婆都係「鏡粉」

電影邀請到MIRROR成員柳應廷演唱主題曲,問阿聰為何不帶兒子到來見偶像?他笑言︰「我會幫佢影張相,然後畀佢睇,等佢尊敬下老竇。我最近發現佢歌單入面大部分都係MIRROR同Jer啲歌,(你老婆謝安琪都係鏡粉?)我老婆就無講明,畀番少少薄面我。(個仔無聽你啲歌?)唉!唔好提,其實個仔喺國際學校讀書,英文一定叻過中文。最近Jer首新歌《砂之器》係小克作詞,內容比較有深度,我問個仔其實聽唔聽得明,我解釋完之後,佢知道好有意思,反而話要聽多一百幾十次。」雖然阿聰戲言有「呷醋」,但他大讚MIRROR有心做好作品,能讓新一代接觸更多廣東歌,他亦想跟12子合作。

同場的Jer被問到阿聰呷醋一事,Jer說︰「佢搞笑啫!上次佢同我傾偈係開心,唔係葡萄!阿聰好大方,我有聽佢嘅歌咪得囉!有機會都想同佢合作,佢無論唱歌或者做戲都係好犀利嘅藝人,好值得學習。」Jer又笑言自己已拋下偶像包袱,希望將來可以演出喜劇。

採訪︰Pauline

美術︰梁政敏

攝影︰林良明

爆囝囝無聽自己歌 張繼聰呷MIRROR醋

阿聰大爆老婆謝安琪和兒子張瞻都是「鏡粉」。(資料圖片)