人氣男團MIRROR成員柳應廷（Jer）繼去年「物語三部曲」後，今年再度與王雙駿（Carl叔叔）及小克合作，推出「重生三部曲」系列，第二部曲《砂之器》以親情為題，讓聽者思考與身邊血脈至親的關係。Jer與不少年輕人一樣，面對至親時，總是不期然表露脾氣最差的一面，亦難以開口說句「對不起」，不過孝順的Jer以實際行動代替說話，成功融化媽咪的心。
柳應廷去年憑「物語三部曲」系列贏得不少新人獎，今年推出「重生系列」第一部曲《狂人日記》後依然大獲好評，近日再推出新歌《砂之器》，探討的課題愈來愈深入。《砂之器》承接《狂人日記》，以「宿命和原諒」為題，歌詞用「今生情侶，下世母子」包裝，講述前世情人約定來生以母子相見，即使角色更改，血脈依然相連。
提到歌曲與日本作家松本清張小說《砂之器》同名，Jer就指︰「其實今年同Carl叔叔同小克做第一首《狂人日記》，已經講定下一首歌都用小說名。無意間呢個小說名又好襯我想講嘅故事，講宿命、對親人嘅關係，覺得用喺呢首歌入面好啱數。嚟緊第三首歌名可能都係用文學作品，但就未confirm係咩名。」他指《砂之器》以心靈書籍《零極限》頭兩式「對不起，請原諒我」為題材，而下一首歌則是與書中後兩式「我愛你，謝謝」有關。
成功讓樂迷反思
Jer希望歌曲令人有所反思︰「當你經歷狂人嘅一生，破壞所有關係時，你都需要對自己或對身邊關係作交代。面對呢啲關係我會選擇去講對唔住，希望對方原諒我。我知道嗰一句道歉唔容易開口，好多網友都留言話自己同屋企人關係好差，呢句『對不起』唔似歌詞中一句『對不起』咁容易開口，純粹想帶出一個課題，等大家思考與身邊人嘅關係。」
不少網民表示聽歌後，反思自己與母親的關係，Jer表示這已達到他的目的：「我聽到好多媽媽，尤其生咗小朋友嘅網友對歌曲感受特別大，聽到呢首歌之後得到啟發。有好多人話自己同媽媽關係唔太好，到面對自己下一代嘅時候，都唔希望重蹈覆轍，從而想修補同媽媽嘅關係。我本身做音樂就希望畀到身邊人力量，覺得呢首歌已經好成功。」
少陪家人感歉意
很多樂迷都覺得Jer的作品有深度，但他坦言起初收到《砂之器》歌詞時，也曾猶豫應否繼續製作高難度的歌曲。「一開頭自己都challenge自己，應唔應該繼續去做咁難嘅歌，聽眾會唔會消化到首歌嘅信息？花姐（經理人黃慧君）、公司又消唔消化到？花姐覺得首歌好難，淨係睇歌詞都唔識解，要查字典。」他意想不到新歌反應甚佳，「原來唔係想像中咁難消化，我好開心可以繼續做咁有深度嘅歌畀大家聽！」
Jer在《砂之器》MV中的母子關係既愛又恨，提到現實中與媽媽的關係，他笑說當然不似歌詞所言般沉重，「未去到離家出走，雖然同媽咪間唔中都有鬧交，但比較sweet多啲。」他指《砂之器》有句歌詞令他感受甚深，「共鳴感最強係『望母親突然白了首』呢句，唱嘅時候諗番自己呢幾年因為工作，少咗時間陪屋企人，睇住佢哋慢慢老去，都想為呢個關係做多啲嘢。」
隊友道歉最難忘
Jer坦言自己有時對媽媽語氣很差，但「對不起」這句說話始終難以啟齒，「有時對媽咪語氣唔好，令佢嬲到幾日唔同我講嘢。通常幾日後我會同媽咪講『唔好嬲啦』，但又唔係講對唔住，純粹係𠱁佢，但佢兩下就被我融化。」他自言為人硬頸，很少會說對不起。「我會用行動表達歉意，多過直接講『對唔住』，我對住自己所愛嘅人反而難開口講『我愛你』；有時我做錯事而要道歉，未必第一時間能夠講到『對唔住』。」
提到他最深刻的一句「對不起」，正是隊友江生（Anson Kong）在《調教你MIRROR》說的那一次，「嗰句『對唔住』去到依家，甚至將來我都會記得。因為嗰個moment好重要、好深刻。『對唔住』真係唔容易開口，所以我好記得。」
服裝：Celine、Giuseppe Zanotti
造型：PIPA Creative
髮型：Man Chan@CHIC Private i SALON
化粧：Giann Cheung @Annie G. Chan Makeup Centre
撰文：林惠珊
攝影：黃紫維、王華婷
美術：梁政敏