雷有輝尾場向林家謙示愛 太極Ricky公開感謝戴夢夢

太極樂隊前晚舉行紅館騷尾場，邀得葉蒨文（沙麗）、夏韶聲，以及人氣當旺的唱作歌手林家謙和MIRROR成員江𤒹生（AK）任嘉賓。太極鼓手朱翰博（Ricky）在台上公開答謝舊愛戴夢夢，他形容二人關係如過山車，未知是否翻撻有望。

太極樂隊前晚與嘉賓齊齊jam歌，氣氛熱烈，已故太極鍵琴手唐奕聰（Gary Tong）遺孀亦連續兩晚捧場。當林家謙出場時，太極主音雷有輝（Patrick）扮女粉絲公開示愛說：「家謙，我愛你！」及後Patrick在家謙鋼琴伴奏下，唱出《怪你過份美麗》。太極亦邀得葉蒨文一起合唱《乾一杯》，沙麗搞笑說要走人：「你哋講咁多嘢都唔畀我講，咁我返屋企瞓覺喇！」

致謝各大支持單位環節時，Patrick抵死叫朱翰博向盛傳翻撻的戴夢夢致謝，Ricky大方說︰「多謝大名娛樂，戴夢夢小姐高層。」Encore環節嘉賓AK要求跟太極合照，Patrick興奮答應︰「有得同AK合照喎，你哋恨唔到㗎！」個唱尾聲，五子逐一答謝Gary太太，鄧建明說：「如果你夢見Gary，麻煩叫佢幫我搵番張八達通，之前去拜祭佢時跌咗，不過Gary好有善心，應該想我做善事。」Ricky則希望Gary太太開心繼續生活。及後Patrick唱《一生不再說別離》時哽咽落淚，Joey亦眼濕濕，最後全場合唱《留住我吧》獻給Gary，演唱會完美謝幕。

感情事似過山車

五子完騷後受訪，Joey笑言覺得Gary在背後「發功」，令他們在尾場精神奕奕。提到Ricky與戴夢夢交情匪淺，Patrick即搶答︰「依家疏遠咗少少！」Ricky則形容雙方關係似過山車︰「行緊，時上時落。（翻撻？過山車去到咩位？）落完準備上番，但又唔夠力，所以跣下跣下！」似暗示有機會復合。

採訪︰Pauline

美術：梁政敏