七仙羽欲打救「婆媳」關係 裕美遭林作母驅趕：喊咗成晚

風水師傅七仙羽主持的ViuTV全新節目《七救星》下周一首播，首集邀得林作與女友裕美，以及林作媽媽王莉妮任嘉賓，欲化解裕美和林母的「婆媳」關係。不過二人在節目中依然水火不容，裕美更在鏡頭前爆喊，她昨日接受《晴報》訪問時，坦言後悔上節目。

《七救星》除了請來嘉賓KB（李健宏）及杜如風，最搶鏡的當然是「林作一家」，夾在女友和媽咪中間的林作有苦自己知，難怪請來七仙羽「調教」家中兩個女人。片段中，林作與媽咪及七師傅坐在餐桌前，裕美拿着一盤水果進來，之後裕美眼泛淚光說︰「唔好意思，我覺得好委屈！」林作媽咪不屑道︰「睇下搵邊個請佢出去啦！」原來裕美答應七師傅的邀請，是有感自己跟林母關係不好，故希望七仙羽替他們化解，但七仙羽卻在IG大爆林母事前不知裕美現身，結果節目以吵鬧收場，林母更嬲到震。

裕美接受本報訪問時，坦言林母在拍攝期間當她透明︰「我諗唔通我連人都不如，我覺得伯母喺背後講咗好多唔鍾意我嘅嘢，咁不如喺我面前講啦，等我死心，我問佢唔鍾意我啲咩，佢只係話『你唔適合我個仔』，拍完節目之後我喊咗成晚。」提到林母說「請佢（裕美）出去」，裕美透露自己無被趕走︰「我好強勢，係你個仔（林作）叫我留喺度。」裕美直言後悔上節目︰「有後悔，好嬲，有啲唔甘心。」不過她笑言七仙羽也不算任務失敗：「（與林母關係）好啲嘅應該，因為有次我入lift時，伯母對住我笑，但我懷疑係我無化粧兼戴口罩，所以佢唔認得係我。」

七師傅化身空姐抹汗

另外，七仙羽日前與ERROR成員193（郭嘉駿）胞妹郭嘉盈（Michelle）一同化身空姐，為本月28日舉辦的全港首個空中音樂會拍宣傳片，兩人與歌手許廷鏗有不少互動。七仙羽向乘客送水、送愛心時說︰「無論你去到邊度，師傅都會愛你、We care你。」但她堅拒和許廷鏗合唱︰「我唱歌唔好聽，又唔係專業歌星，我做遞水、遞毛巾，幫佢潤喉嚨、抹汗。」

撰文︰倪小珊

美術︰梁政敏