入行20周年回饋粉絲 張敬軒設逾2千呎活動中心

自紅館個唱後，張敬軒已超過半年沒有公開露面，疫情期間原定跟歌迷見面的活動亦相繼取消。前晚軒仔出席活動，獲大批粉絲撑場；而今年入行20周年的軒仔透露將會舉辦慶祝活動，亦將設立逾2,000呎的粉絲活動中心，認真愛錫fans！

張敬軒前晚到中環出席展覽活動，吸引近300名fans到場支持，場面熱鬧。今年是軒仔入行20周年，問軒仔會否舉辦慶祝活動？他說︰「其實班fans真係好好，佢哋想搞好多活動，好熱情，所以自己都要有啲表示，詳情之後會再公布。」提到他早前現身巴士站準備秘密拍攝，打算給予歌迷驚喜，卻因行蹤外洩令計劃泡湯，他苦笑謂︰「既然都已經被fans拍晒片、影晒相，無晒驚喜，所以索性取消。」

輕鬆解讀黎明金句

向來疼惜fans的軒仔，之前透露正在香港及廣州物色地方，設立粉絲活動中心，問到進度如何？軒仔表示廣州的監控嚴格，目前仍未成事，但已在港物色逾2,000呎的地方，希望十月前能夠正式運作。他表示︰「平時見fans為我整燈牌，付出好多時間同心機，我唔想佢哋成日租party room，（投資幾多？）有限錢。」另外，軒仔透露早前已搬新屋，問到工人「遮遮」可有新搞作？他表示︰「『遮遮』之前整啲麵包，食到我水腫，睇醫生先知我原來唔可以食麩質嘢，所以依家要斷食，同埋重新調理身體。」

另外，軒仔近日跟黎明（Leon）合作推出新歌，問到Leon可有爆金句？軒仔笑言︰「佢當面講嘅嘢，我全部都通同明白，其實佢係一個好哲學嘅人。（有無提佢囡囡？）無，我哋好少講私事，大家只係見過兩、三次面。」軒仔昨日亦在社交平台發「千字文」，形容是次合作是「夢幻美好的奇妙旅程」，並留言大讚Leon︰「有時前輩二字，並不着眼於年資，更多的是工作態度與層次…身旁的黎生猶如隔鄰一起成長的大哥，無微不至、談笑風生。」

採訪︰Pauline

攝影︰林良明

美術︰梁政敏