謝霆鋒難忘陳木勝︰佢真係好紳士

謝霆鋒與甄子丹主演的新片《怒火》將於下周四（19日）上映，兩位打得之人有不少互相糟質的場面，每招拳拳到肉打到飛起，看得觀眾相當肉緊；而令霆鋒甘願冒性命危險為電影付出的，只有執導該片的已故導演陳木勝，提到這位伯樂因鼻咽癌離世，感觸萬分的霆鋒揚言要珍惜每一天，活得精采。

鮮有在港露面的謝霆鋒，日前專程返港為《怒火》造勢，他指片中有大量拳腳打鬥，亦要舞弄很多兵器，他拍攝前更花個多月時間苦練蝴蝶刀。「我之前有玩開單手嘅，但喺戲裏面嘅就係雙手蝴蝶刀。」甄子丹在片中亦兼任動作導演，霆鋒坦言子丹對每個動作要求甚高︰「尤其喺教堂對打嘅ending，我哋拍咗十日，佢有解釋點解要我攞雙刀，係要我挑戰佢喺《殺破狼》中同吳京對打嗰幕，所以佢繼續攞警棍，但我要攞雙刀，因為佢話不如挑戰經典，真係搞着我。」

霆鋒和子丹打鬥時有不少殘忍的狠毒招數，他笑言與子丹都不願意互相糟質，但為了拍出港產動作片的味道，兩人惟有豁出去。霆鋒更大爆子丹為了保住他的靚仔樣而有所顧慮︰「有場戲我被子丹『質』個頭落鋼琴上再拖行，但佢唔忍心，覺得大家都靠樣搵食，我記得導演游說咗佢半日。」霆鋒直言近年已甚少這類埋身打鬥的港產電影，所以十分懷念和導演陳木勝的合作︰「係佢（陳木勝）先拍得出呢種味道，全世界都無，係你睇到演員打鬥時，會縮一縮膊頭嗰隻痛。」他跟陳木勝合作多次，演過很多危險動作戲，多年來已將性命交給對方，他現在並非不敢拍危險動作，但要看是哪一位導演︰「除咗我自己攞自己條命嚟搏，萬一我有咩事，或判斷錯誤，成部戲就唔使拍。」

看導演遺作落淚

早前霆鋒已率先欣賞陳木勝導演這部電影遺作，他邊看電影邊感觸落淚。「我無諗過入到去戲院係會喊嘅，我呢十幾年都無流過眼淚，但始終生死關頭都交咗畀佢，好似《特警新人類》、《新警察故事》等，啲回憶返晒嚟，會諗番起呢場戲我哋點拍，佢講嘅每句說話；好記得有一日我同馮德倫、吳彥祖同李璨琛四個捉咗佢出嚟，我哋影咗張《特警3》嘅相，之後不停叫導演再拍第三集，我話我哋老喇，再唔開就變『特警老人類』，最深刻係佢話我哋當時全部都係新人，只可以用菲林去洗禮，要keep住拍我哋，要畀經歷我哋先會真正成長，不過其實依家講乜都無用。」

霆鋒大讚陳木勝是圈中唯一不煙不酒、不發脾氣、不講粗口的導演，他笑稱︰「大家都明白喺片場㗎啦，但佢真係好紳士，做嘅嘢永遠都唔會傷害到人。（學到佢呢幾個優點？）學唔到，每個人都有佢嘅崗位，我又唔會做到佢，佢嘅戲又好需要我呢啲願捱願打、搓圓㩒扁嘅演員。」可惜在電影後期配音時，霆鋒才得知導演病危︰「我幫電影配完音兩日，導演就走咗，我自己多心喺度諗，可能導演知道霆鋒配完音喇，件事完成咗，佢先至走。一個咁健康嘅人因為鼻咽癌而走，真係好諷刺，所以每一日都要活着便精采，珍惜每一日。」

髮型︰Ricky Kwok

場地︰The Crown＠英皇駿景酒店

撰文︰倪小珊

攝影︰Alma

美術︰顏玉玲