【聲明】港生活網站並無進行電話推廣活動

謝霆鋒難忘陳木勝︰佢真係好紳士

發佈時間: 2021/08/13

謝霆鋒與甄子丹主演的新片《怒火》將於下周四(19日)上映,兩位打得之人有不少互相糟質的場面,每招拳拳到肉打到飛起,看得觀眾相當肉緊;而令霆鋒甘願冒性命危險為電影付出的,只有執導該片的已故導演陳木勝,提到這位伯樂因鼻咽癌離世,感觸萬分的霆鋒揚言要珍惜每一天,活得精采。

鮮有在港露面的謝霆鋒,日前專程返港為《怒火》造勢,他指片中有大量拳腳打鬥,亦要舞弄很多兵器,他拍攝前更花個多月時間苦練蝴蝶刀。「我之前有玩開單手嘅,但喺戲裏面嘅就係雙手蝴蝶刀。」甄子丹在片中亦兼任動作導演,霆鋒坦言子丹對每個動作要求甚高︰「尤其喺教堂對打嘅ending,我哋拍咗十日,佢有解釋點解要我攞雙刀,係要我挑戰佢喺《殺破狼》中同吳京對打嗰幕,所以佢繼續攞警棍,但我要攞雙刀,因為佢話不如挑戰經典,真係搞着我。」

霆鋒和子丹打鬥時有不少殘忍的狠毒招數,他笑言與子丹都不願意互相糟質,但為了拍出港產動作片的味道,兩人惟有豁出去。霆鋒更大爆子丹為了保住他的靚仔樣而有所顧慮︰「有場戲我被子丹『質』個頭落鋼琴上再拖行,但佢唔忍心,覺得大家都靠樣搵食,我記得導演游說咗佢半日。」霆鋒直言近年已甚少這類埋身打鬥的港產電影,所以十分懷念和導演陳木勝的合作︰「係佢(陳木勝)先拍得出呢種味道,全世界都無,係你睇到演員打鬥時,會縮一縮膊頭嗰隻痛。」他跟陳木勝合作多次,演過很多危險動作戲,多年來已將性命交給對方,他現在並非不敢拍危險動作,但要看是哪一位導演︰「除咗我自己攞自己條命嚟搏,萬一我有咩事,或判斷錯誤,成部戲就唔使拍。」

看導演遺作落淚

早前霆鋒已率先欣賞陳木勝導演這部電影遺作,他邊看電影邊感觸落淚。「我無諗過入到去戲院係會喊嘅,我呢十幾年都無流過眼淚,但始終生死關頭都交咗畀佢,好似《特警新人類》、《新警察故事》等,啲回憶返晒嚟,會諗番起呢場戲我哋點拍,佢講嘅每句說話;好記得有一日我同馮德倫、吳彥祖同李璨琛四個捉咗佢出嚟,我哋影咗張《特警3》嘅相,之後不停叫導演再拍第三集,我話我哋老喇,再唔開就變『特警老人類』,最深刻係佢話我哋當時全部都係新人,只可以用菲林去洗禮,要keep住拍我哋,要畀經歷我哋先會真正成長,不過其實依家講乜都無用。」

霆鋒大讚陳木勝是圈中唯一不煙不酒、不發脾氣、不講粗口的導演,他笑稱︰「大家都明白喺片場㗎啦,但佢真係好紳士,做嘅嘢永遠都唔會傷害到人。(學到佢呢幾個優點?)學唔到,每個人都有佢嘅崗位,我又唔會做到佢,佢嘅戲又好需要我呢啲願捱願打、搓圓㩒扁嘅演員。」可惜在電影後期配音時,霆鋒才得知導演病危︰「我幫電影配完音兩日,導演就走咗,我自己多心喺度諗,可能導演知道霆鋒配完音喇,件事完成咗,佢先至走。一個咁健康嘅人因為鼻咽癌而走,真係好諷刺,所以每一日都要活着便精采,珍惜每一日。」

髮型︰Ricky Kwok

場地︰The Crown@英皇駿景酒店

撰文︰倪小珊

攝影︰Alma

美術︰顏玉玲

謝霆鋒難忘陳木勝︰佢真係好紳士

霆鋒與陳木勝合作無間,兩人亦師亦友。(影片截圖)

謝霆鋒難忘陳木勝︰佢真係好紳士

陳木勝的溫文爾雅,令霆鋒最深刻。(影片截圖)

謝霆鋒難忘陳木勝︰佢真係好紳士

甄子丹與霆鋒早前在上海宣傳《怒火》時,憶起陳木勝感觸落淚。(資料圖片)

謝霆鋒難忘陳木勝︰佢真係好紳士

甄子丹考慮半天才肯將霆鋒按在鋼琴上拖行,深怕會弄傷霆鋒的靚仔樣。(影片截圖)