【聲明】港生活網站並無進行電話推廣活動

星級家長的樂與怒 陳凱琳︰被大仔飛撲攬住融化

發佈時間: 2021/08/16

每個小朋友都是爸媽的心肝椗,孩子的一個舉動或一個表情,便能夠輕易融化爸媽的心;不過孩子有時也會化身「小魔怪」,讓父母十分激氣!娛樂圈有不少星級家長,未知他們的心肝寶貝又有甚麼窩心事和激氣事呢?

陳凱琳(Grace)與老公鄭嘉穎18年結婚後,先後誕下大仔鄭承悅(Rafael)和細仔鄭承亮(Yannick)。她前日在社交網分享和大仔玩耍的片段,見她在片中教Rafael說「媽咪醒,媽咪勁,媽咪無得頂」,Rafael也會跟着說,𠱁得Grace非常開心。事實上,每當提到囝囝,Grace即面露幸福笑容,並說︰「大仔知我出街,每次返到屋企,佢就好興奮撲過嚟叫『媽咪』!就算我話未消毒,佢都照攬住我,我知佢掛住我就好開心。」

當然,囝囝也有令Grace激氣的時候,她表示︰「有時拖大仔過馬路,佢會突然失控揈開我隻手,我喝住佢,佢又會好激動咁大嗌,搞到我好激氣!不過佢都算幾聽話,有時見我突然好認真,就知道我真係嬲,唔敢亂嚟。」另外,小朋友偏食的問題也讓Grace相當頭痛,她指大仔經常不肯吃飯,只喜歡飲湯,那Grace的煲湯技巧豈不是很厲害?她笑謂︰「Rafael無論啲湯有無味都話好飲,所以呢方面無乜壓力,哈哈!」

單文柔︰唔肯飲水勁擔心

單文柔(Phoebe)和陳展鵬視女兒陳諾瑤(小豬比)為掌上明珠,不過Phoebe指自己不會寵壞女兒︰「依家佢開始學講嘢,又鍾意同小朋友玩,有時見到差唔多大嘅小朋友就會好興奮同熱情,一手拍落去。每次見到佢做唔啱嘅事,我就會扮嬲,教佢學識道歉,所以我唔會即刻同佢講嘢,通常佢望下我,就走過嚟同我講sorry。」

小豬比萌爆令父母冧到暈,但原來Phoebe非常擔心她不肯飲水,Phoebe表示︰「呢大半年用盡方法,甚至帶佢睇中、西醫都唔肯飲水,沖開奶茶、粟米水都唔得,一係就『耍太極』,一係揈晒手猛話『no』。佢唔飲水就去唔到便便,無得去便便就會發脾氣,其實係惡性循環;好彩佢仲肯飲少少魚湯,所以我每日都會煲湯水畀佢飲,佢肯飲我已經好開心。」

林子善︰個女當我係媽咪

林子善19年底當上爸爸,提到囡囡林以晴(小乖乖),子善不禁流露冧樣︰「由佢四、五個月大開始,我已經做緊佢嘅『陪瞓』,𠱁佢瞓覺嘅時候,佢最鍾意用手指仔整我心口,又不停講BB話,嗰刻感覺啲眼淚想湧出嚟。我本身信佛,信因果輪迴,我同個女嘅關係就好似個天一早安排好。」此時子善不禁眼泛淚光,流露一副慈父模樣。

子善指「小公主」十分黐身,他笑說在女兒眼中自己才是「媽媽」,更直言太太曾醋意大發︰「有次太太突然爆喊問我︰『我都好錫個女,又𠱁佢瞓,點解佢唔跟我?』我即刻安慰太太︰『咁你要做嘢嘛,我兩個都錫!』」問他會否為女兒添個弟妹?子善認為太太生B過程很辛苦,加上女兒還小,待幾年後經濟環境許可的情況下才作考慮。

張繼聰︰絕境下感到溫暖

出名是好爸爸的張繼聰不時會在網上分享一對仔女的窩心事,他直言仔女做的每件事,都令他感到很溫暖,「有時番工好攰,阿仔都會message問我『攰唔攰?』,或者講『好掛住你』,呢啲說話已經好窩心。之前我去澳門拍戲要隔離21日,佢哋每日都會同我傾偈,每個message都令我覺得喺『絕境』下有啲溫暖。」

阿聰表示自己與太太謝安琪(Kay)在教導子女方面有共識,大家都比較嚴謹,但阿聰直言開始擔心囝囝張瞻︰「男仔有時會粗魯啲,佢有時會喺學校同啲同學仔鬧交,或者有啲身體接觸,但又未至於令到我好激氣,佢哋都無我細個嗰時咁曳。其實個仔開始大、開始懂事,有時仲會幫手照顧妹妹!」

採訪︰Pauline

美術︰梁政敏

星級家長的樂與怒 陳凱琳︰被大仔飛撲攬住融化

Grace與小朋友的關係非常融洽。(IG圖片)

星級家長的樂與怒 陳凱琳︰被大仔飛撲攬住融化

大仔Rafael從幼兒園畢業,讓Grace十分開心。(IG截圖)

星級家長的樂與怒 陳凱琳︰被大仔飛撲攬住融化

Phoebe笑指展鵬每次聲稱要教訓女兒,但轉頭又大讚囡囡抵錫。(IG圖片)

星級家長的樂與怒 陳凱琳︰被大仔飛撲攬住融化

Phoebe不時帶囡囡「親親大自然」。(IG圖片)

星級家長的樂與怒 陳凱琳︰被大仔飛撲攬住融化

子善直言妻女是他現時最珍惜的事。(IG圖片)

星級家長的樂與怒 陳凱琳︰被大仔飛撲攬住融化

在疫情下,子善的工作減少,決定化身「湊女公」照顧囡囡。(IG圖片)

星級家長的樂與怒 陳凱琳︰被大仔飛撲攬住融化

阿聰早前拍攝電影,獲太太及女兒張靖探班,非常溫馨。(IG圖片)

星級家長的樂與怒 陳凱琳︰被大仔飛撲攬住融化

阿聰十分欣賞囝囝張瞻會幫忙照顧妹妹。(IG截圖)